कोंबडा नव्हे हा तर ‘सिक्युरिटी गार्ड’, सोलापूरच्या शेतकऱ्याचा विकायला नकार, का आहे खास? Video | शेती बातम्या

अरुण शिंदे यांनी काही वर्षांपूर्वी आंध्रप्रदेशातून ‘असील’ जातीच्या कोंबड्याची पिल्ले आणली. आज त्यांच्याकडे जवळपास पाच वर्षांचा नर कोंबडा आणि एक मादी कोंबडी आहे. हा कोंबडा दिसायला अत्यंत देखणा आणि मजबूत असून, त्याचे वजन तब्बल 4 ते 5 किलो आहे, तर मादीचे वजन अडीच किलोपर्यंत आहे. या जोडीची बाजारातील क्रेझ पाहून एका ग्राहकाने थेट 10 ते 12 हजार रुपयांची बोली लावली होती. मात्र, शिंदे यांनी या मोहाला बळी न पडता आपल्या लाडक्या पक्षाला जवळच ठेवणे पसंत केले.

या कोंबड्याचे वैशिष्ट्य म्हणजे हा केवळ एक पक्षी नसून, अरुण शिंदे यांच्या पूर्ण फार्मचा ‘सुरक्षारक्षक’ (सिक्युरिटी गार्ड) बनला आहे. फार्मवर जर कोणी अनोळखी व्यक्ती आली, किंवा इतर कोणताही हिंस्त्र प्राणी अथवा पक्षी घुसला, तर हा असील कोंबडा थेट त्यांच्यावर हल्ला करतो आणि फार्मचे रक्षण करतो. त्याच्या या धाडसी स्वभावामुळे फार्मवरील इतर पक्षांचेही रक्षण होते.

“या असील जातीच्या पक्षांचे ब्रीडिंग (पैदास) करायचे आहे. या दर्जेदार आणि लढवय्या जातीची संख्या आपल्या भागात वाढवण्याचा माझा मानस आहे. यामुळेच इतकी मोठी किंमत मिळत असतानाही मी या जोडीची विक्री केली नाही,” असे अरुण शिंदे यांनी लोकल18 सोबत बोलताना सांगितले.