सर्व अंगणवाड्या,शाळा, कॉलेजला सुट्टी; शिक्षक अन् कर्मचाऱ्यांना ड्यूटी लावली; लोणावळा नगरपरिषदेकडून तातडीचे आदेश | महाराष्ट्र बातम्या

लोणावळा आणि मावळ परिसरात गेल्या काही दिवसांपासून संततधार पाऊस सुरू आहे. हवामान खात्याचा अंदाज आणि भौगोलिक परिस्थिती लक्षात घेता, नगरपरिषदेचे सदस्य, प्रशासकीय अधिकारी आणि शिक्षण विभागाने शाळांना सुट्टी देण्याची विनंती मुख्याधिकाऱ्यांकडे केली होती. संभाव्य आपत्ती टाळण्यासाठी आणि विद्यार्थ्यांचा जीव धोक्यात येऊ नये म्हणून हा निर्णय घेण्यात आला आहे.

विद्यार्थ्यांना सुट्टी देण्यात आली असली तरी शाळांमधील सर्व मुख्याध्यापक, शिक्षक आणि शिक्षकेतर कर्मचाऱ्यांना कोणताही दिलासा मिळालेला नाही. आदेशात स्पष्ट करण्यात आले आहे की, सर्व कर्मचाऱ्यांनी कार्यालयीन वेळेत शाळेत किंवा संबंधित कार्यालयात उपस्थित राहणे बंधनकारक आहे. स्थानिक प्रशासनाच्या आदेशानुसार या सर्व कर्मचाऱ्यांना आपत्ती व्यवस्थापनाच्या (Disaster Management) कामात सक्रिय सहभाग घ्यावा लागणार आहे. या आदेशाची अंमलबजावणी तात्काळ करण्याचे निर्देश देण्यात आले आहेत.