ENG vs SA ICC Women’s T20 World Cup 2026 : यजमान इंग्लंड संघाने ओव्हलच्या मैदानावर खेळल्या गेलेल्या सेमीफायनल सामन्यात दक्षिण आफ्रिकेचा 40 धावांनी पराभव करत टी-20 विश्वचषकाच्या अंतिम फेरीत दिमाखात प्रवेश केला आहे. 2018 नंतर पहिल्यांदाच इंग्लिश संघ या स्पर्धेच्या विजेतेपदाच्या सामन्यात पोहोचला आहे, जिथे रविवारी लॉर्ड्सच्या ऐतिहासिक मैदानावर त्यांचा सामना त्यांचा पारंपरिक प्रतिस्पर्धी ऑस्ट्रेलियाशी होईल.
इंग्लंडची खराब सुरुवात आणि रेकॉर्ड भागीदारी
नाणेफेक (टॉस) हारल्यानंतर प्रथम फलंदाजी करण्यासाठी उतरलेल्या इंग्लंडची सुरुवात अत्यंत खराब झाली. संघाने अवघ्या 23 धावांवर आपले 3 आघाडीचे फलंदाज गमावले होते. अशा बिकट परिस्थितीत कर्णधार नेट सायव्हर-ब्रंट आणि हिथर नाइट यांनी डावाची धुरा सांभाळली. या दोघींमध्ये 90 चेंडूंमध्ये 133 धावांची ऐतिहासिक आणि विक्रमी भागीदारी झाली, ज्याने सामन्याचे चित्रच पालटून टाकले. पूर्णपणे तंदुरुस्त नसतानाही सायव्हर-ब्रंटने उत्कृष्ट फटकेबाजी केली आणि दक्षिण आफ्रिकेच्या गोलंदाजांना बॅकफूटवर ढकलले. यामुळे इंग्लंडला 169 धावसंख्या उभारता आली.
मोक्याच्या क्षणी दक्षिण आफ्रिकेची पुन्हा हुकली संधी
170 धावांच्या आव्हानाचा पाठलाग करण्यासाठी मैदानात उतरलेल्या दक्षिण आफ्रिकेच्या संघाला त्यांची कर्णधार लॉरा वोल्वार्ड हिच्याकडून मोठ्या खेळीची अपेक्षा होती. वोल्वार्ड उत्कृष्ट फॉर्ममध्ये दिसतही होती, परंतु सहाव्या षटकात सोफी एक्लेस्टोनने मिड-ऑनवर तिचा एक अप्रतिम झेल पकडून दक्षिण आफ्रिकेला सर्वात मोठा धक्का दिला. यानंतर एक्लेस्टोनने शॉर्ट फाइन लेगवर सुने लूसचा आणखी एक कठीण झेल घेत इंग्लंडच्या चपळ क्षेत्ररक्षणाचे दर्शन घडवले.
टॅझमिन ब्रिट्सचे अर्धशतक गेले व्यर्थ (England Women win by 40 runs)
टॅझमिन ब्रिट्सने 44 चेंडूंत अर्धशतक झळकावून दक्षिण आफ्रिकेच्या आशा जिवंत ठेवण्याचा आटोकाट प्रयत्न केला. मात्र, चार्ली डीनच्या फिरकीसमोर दक्षिण आफ्रिकेची मधली फळी पत्त्यांच्या बंगल्यासारखी कोलमडली. ब्रिट्स आणि धोकादायक ऑलराउंडर मारिझाने काप या दोन्ही खेळाडू एक्स्ट्रा कव्हरवर नेट सायव्हर-ब्रंटच्या हाती झेल देऊन बाद झाल्या. एकवेळ 5 बाद ९५ धावा अशा मजबूत स्थितीत असलेला दक्षिण आफ्रिकेचा संघ नंतर पूर्णपणे विखुरला गेला आणि निर्धारित षटकांत लक्षापासून खूप दूर राहिला.
2023 च्या पराभवाचा घेतला बदला
इंग्लंडचा हा विजय म्हणजे साल 2023 च्या उपांत्य सामन्यात दक्षिण आफ्रिकेकडून मिळालेल्या पराभवाचा घेतलेला अचूक बदला आहे. ग्रुप स्टेजमध्ये कोणत्याही मोठ्या आव्हानाशिवाय एकतर्फी विजय मिळवत पुढे जाणाऱ्या इंग्लंड संघाने आता आपल्या मायदेशात खेळल्या जाणाऱ्या या महाकुंभाच्या अंतिम सामन्याचे तिकीट पक्के केले आहे.
हे ही वाचा –
