एका कादंबरीवर आधारित वेब सीरिज सध्या ओटीटीवर अनेकांच्या 'मस्ट वॉच' यादीत समाविष्ट झाली आहे. अवघ्या चार दिवसांत ही नवीन सीरिज अनेक टॉप-रेटेड थ्रिलर सीरिजना पछाडत ट्रेंडिंग यादीत पोहोचली आहे. ही एक लिमिटेड क्राइम ड्रामा सीरिज आहे, ज्याला आयएमडीबीवरही (IMDb) तगडी रेटिंग मिळाली आहे.
आठ एपिसोड्सच्या या सीरिजला फक्त परदेशातच नाही तर भारतातही खूप पसंती मिळत आहे. या सीरिजने स्टँडअप कॉमेडियन समय रैनाच्या 'इंडियाज गॉट लेटंट'च्या दुसऱ्या सिझनलाही मागे टाकलं आहे. या मिनी सीरिजचं नाव 'आय विल फाइंड यू' (I Will Find You) असं आहे. हार्लन कोबेन यांच्या त्याच नावाच्या बेस्ट सेलिंग कादंबरीवर आधारित ही सीरिज आहे.
हार्लन कोबेन या सीरिजचे कार्यकारी निर्मातेसुद्धा आहेत. यामध्ये सॅम वर्थिंग्टन, ब्रिट लोअर, माइलो वेंटिमिग्लिया आणि एरिन रिचरर्ड्स यांच्या मुख्य भूमिका आहेत. या सीरिजमध्ये एका अशा पित्याची कहाणी दाखवण्यात आली आहे, ज्यांच्यावर त्यांच्याच मुलाच्या हत्येचा गंभीर आरोप आहे. मुलाच्या हत्येप्रकरणी पित्याला तुरुंगवासाची शिक्षा सुनावण्यात येते.
तुरुंगात असलेल्या पित्याला कुठेतरी वाटत असतं की त्यांचा मुलगा जिवंत आहे. त्यामुळे तुरुंगातून निघताच ते मुलाच्या शोधात जातात. मात्र या खतरनाक प्रवासात त्यांच्यासमोर काही असे रहस्य येतात, ज्यामुळे सर्वांनाच मोठा धक्का बसतो. ही सीरिज 18 जून रोजी नेटफ्लिक्स या ओटीटी प्लॅटफॉर्मवर प्रेक्षकांच्या भेटीला आली.
ओटीटी प्लॅटफॉर्मवर स्ट्रीम होताच ही वेब सीरिज टॉप ट्रेंडिंग लिस्टमध्ये दुसऱ्या क्रमांकावर पोहोचली. या वेब सीरिजचने 'टीच यू अ लेसन' आणि 'इंडियाज गॉट लेटंट 2'ला मागे टाकलं आहे. या क्राइम थ्रिलरला आयएमडीबीवर दहापैकी 7.3 रेटिंग मिळाली आहे. या आठ एपिसोड्सच्या मिनी सीरिजचा रन-टाइम एक तासापेक्षाही कमी आहे.
