Nalasopara Crime: माथेफिरूच्या हाती शस्त्र, तरुणीच्या दिशेने धाव… पण क्षणात सर्व काही बदललं!

नालासोपारा पश्चिमेच्या सोपार गावात करारी मिल्सजवळ लोटस केमिस्ट नावाचे दुकान आहे. या दुकानात २० वर्षीय तरुणी काम करते. मंगळवारी संध्याकाळी ५ वाजता याच परिसरात राहणारा २२ वर्षीय सोहेल शेख दुकानात आला आणि त्याने तरुणीला शिविगाळ करण्यास सुरुवात केली. साहिलने सोबत चॉपर आणला होता. तो तिला मारणार इतक्यात दुकान मालक विशाल व्यवहारे (३३) मधे पडले.
Nalasopara Crime :विजय चौहान हत्या प्रकरण: फरार पत्नी आणि तिच्या प्रियकराला पुण्यातून अटक
त्यांनी वार अंगावर झेलला. त्यात त्यांच्या हाताला आणि चेहऱ्याला गंभीर दुखापत झाली. हल्ल्यानंतर आरोपी सोहेल शेख पळून गेला आहे. त्याच्याविरोधात नालासोपारा पोलिस ठाण्यात हत्येचा प्रयत्न केल्याचा गुन्हा दाखल करण्यात आला आहे. आम्ही आरोपीच्या मागावर असून, लवकरच त्याला अटक करू, असे नालासोपारा पोलिसांनी सांगितले. तीन-चार महिन्यांपासून तिला तो त्रास देत होता. तिला धमकी देत होता. सोहेल आधी घरी आला. त्यानंतर तो तिला मारण्यासाठी मेडिकल दुकानात गेला होता, असे तरुणीच्या काकांनी सांगितले.

आरती यादव प्रकरणाची पुनरावृत्ती टळली

वसई पूर्वेच्या गावराईपाडा येथे १८ जून २०२४ रोजी आरती यादव (२२) या तरुणीची रोहित पाल (२९) या तरुणाने भररस्त्यात हाथोडीचा घाव घालून हत्या केली होती. रोहित आणि आरतीचे प्रेमसंबंध संपुष्टात आले होते. मात्र, तरी रोहित तिच्या मागे लागला होता. ती टाळत असल्याने रोहितने सकाळी नऊ वाजण्याच्या सुमारास आरती कामावर जात असताना रस्त्यात गाठून तिची हत्या केली होती. यावेळी जमाव तिला वाचवण्याऐवजी मोबाइलने शूटिंग करण्यात व्यग्र होता.