बॉलिवूडचा ‘मिस्टर परफेक्शनिस्ट’ अर्थात अभिनेता आमिर खान लवकरच तिसऱ्यांदा लग्नबंधनात अडकणार आहे. येत्या 5 जुलै रोजी घरात छोटेखानी समारंभ पार पडणार आहे. गर्लफ्रेंड गौरी स्प्रॅटसोबतच्या या लग्नाबद्दल खुद्द आमिरने माध्यमांसमोर प्रतिक्रिया दिली आहे. विशेष म्हणजे यावेळी, त्याचा आणि पहिली पूर्व पत्नी रिना दत्ताचा मुलगा जुनैद खानसुद्धा त्याच्या बाजूलाच उपस्थित होता. 61 वर्षीय आमिर त्याच्या तिसऱ्या लग्नाविषयी बोलताना बाजूला उभ्या असलेल्या जुनैद खानच्या प्रतिक्रियेनं सर्वांचं लक्ष वेधलं आहे. जुनैद हा आमिर आणि त्याची पहिली पूर्व पत्नी रिना दत्ता यांचा मोठा मुलगा आहे. सोशल मीडियावर हा व्हिडीओ व्हायरल होत असून त्यावर नेटकऱ्यांकडून प्रतिक्रियांचा पाऊस पडतोय.
मुंबईतील एका कार्यक्रमात आमिर त्याच्या मुलासोबत पोहोचला होता. यावेळी माध्यमांशी बोलताना त्याने सांगितलं, “होय, 5 जुलै रोजी माझं लग्न होत आहे. हा छोटेखानी समारंभ असेल आणि घरीच तो पार पडणार आहे. यावेळी दोघांचेही कुटुंबीय उपस्थित असतील. 5 जुलै आमच्यासाठी खूपच खास दिवस आहे. दोघांचे कुटुंबीय, मित्रपरिवार आणि घरातच छोटासा कार्यक्रम होणार आहे. तुम्हा सगळ्यांच्या दुआं (आशीर्वाद) आम्हाला हवे आहेत. आम्ही खुश राहो, यासाठी सर्वांनी प्रार्थना करा आणि आशीर्वाद द्या.” हे सर्व सांगताना आमिरच्या बाजूलाच उभा असलेला जुनैद हसताना आणि आनंद व्यक्त करताना दिसतोय.
पहा व्हिडीओ-
आमिरच्या या व्हिडीओवर नेटकरी विविध प्रतिक्रिया देत आहेत. काहींनी वयाच्या 61 व्या वर्षी तिसऱ्या लग्नावरून मिश्किल टिप्पण्याही केल्या आहेत. ‘आमचा आशीर्वाद तर असेलच, पण तुम्ही पुन्हा विभक्त होऊ नका’, असा टोला एकाने लगावला. तर ’30 वर्षांच्या मुलासमोर तिसऱ्या लग्नाची घोषणा.. पुढच्या पिढीला बॉलिवूड काय शिकवतंय’, असं दुसऱ्याने म्हटलंय. ‘हा माणूस खरंच आयुष्य एंजॉय करतोय’, असेही कमेंट्स नेटकऱ्यांनी केले आहेत.
आमिर खानने त्याच्या 60 व्या वाढदिवशी गौरी स्प्रॅटसोबत रिलेशनशिपमध्ये असल्याची घोषणा केली होती. त्यानंतर हे दोघं लिव्ह-इन रिलेशनशिपमध्ये राहू लागले. आमिरने याआधी रिना दत्ता आणि किरण राव यांच्याशी लग्न केलं होतं. रिना दत्तापासून आमिरला जुनैद आणि आयरा ही दोन मुलं आहेत. तर किरण राव आणि आमिर यांना आझाद हा 14 वर्षांचा मुलगा आहे.
