मोबाईल मॅपने रस्ता चुकवला अन् काळानं गाठलं; बाप्पाच्या दर्शनाहून परतताना महिलेचा घात झाला, पोटच्या लेकाचा टाहो | मुंबई बातम्या (Mumbai News)

मिळालेल्या माहितीनुसार, कल्याण पश्चिम परिसरात राहत असलेल्या अरुणा कुलकर्णी या 28 जून रोजी त्यांचा मुलगा प्रतीक कुलकर्णी याच्यासोबत बाईकवरुन टिटवाळा येथील प्रसिद्ध गणपती बाप्पााच्या दर्शनासाठी गेल्या होत्या. दिवसभर बाप्पाचे दर्शन घेऊन आणि लेकासोबत आनंदात वेळ घालवून त्या रात्रीच्या वेळी कल्याणच्या दिशेने परत येत होते.

दुर्दैवी गोष्ट म्हणजे रात्रीची वेळ आणि रस्त्यावर असलेला अंधार त्यामुळे रस्त्याचा अंदाज लावणे कठीण जात होते. दरम्यान दुचाकी ही जांभळे गावातील पुलावर आली असता तिथे एक मोठा खड्डा होता. त्यामुळे वेग नियंत्रित करेपर्यंत दुचाकी थेट खड्ड्यात आदळली आणि अनियंत्रित होऊन रस्त्यावर घसरली. हा अपघात इतका भीषण होता की दुचाकीवर पाठी बसलेल्या अरुणा या रस्त्यावर जोरदार आपटल्या. ज्यात त्यांना गंभीर दुखापत होऊन त्यांचा मृत्यू झाला.