हिंदी चित्रपटसृष्टीत अनेक कलाकार येतात, यशाच्या शिखरावर पोहोचतात आणि काळाच्या ओघात विस्मृतीत जातात. मात्र काही कलाकारांनी साकारलेल्या भूमिका प्रेक्षकांच्या मनावर इतक्या खोलवर कोरल्या जातात की, त्या त्यांच्या ओळखीचाच भाग बनतात.
अशाच अभिनेत्रींपैकी एक म्हणजे अनिता गुहा. 'जय संतोषी माँ' या चित्रपटातील संतोषी मातेच्या भूमिकेमुळे त्या घराघरात पोहोचल्या. इतकेच नाही तर अनेकांनी त्यांना प्रत्यक्ष देवीचे स्वरूप मानून त्यांच्या फोटोचीही पूजा केली. मात्र पडद्यावर देवतेची भूमिका साकारणाऱ्या या अभिनेत्रीचे वैयक्तिक आयुष्य मात्र अनेक दुःखांनी व्यापलेले होते.
1975 हे वर्ष हिंदी चित्रपटसृष्टीसाठी विशेष ठरले. याच वर्षी 'शोले' आणि 'दीवार' यांसारखे चित्रपट प्रदर्शित झाले. त्याच काळात प्रदर्शित झालेल्या 'जय संतोषी माँ' या धार्मिक चित्रपटानेही प्रचंड यश मिळवत बॉक्स ऑफिसवर सर्वांचे लक्ष वेधून घेतले.
मर्यादित बजेटमध्ये तयार झालेल्या या चित्रपटाने त्या काळात तब्बल पाच कोटी रुपयांहून अधिक कमाई केल्याचे सांगितले जाते. विशेष म्हणजे, या चित्रपटात अनिता गुहा यांची भूमिका केवळ सुमारे 20 मिनिटांची होती. तरीही त्यांच्या प्रभावी अभिनयामुळे त्या एका रात्रीत लोकप्रियतेच्या शिखरावर पोहोचल्या.
चित्रपट प्रदर्शित झाल्यानंतर अनेक भाविकांनी त्यांना संतोषी मातेचे रूप मानले. त्यांच्या पोस्टर्सना हार घालून पूजा केली जात होती. एखाद्या अभिनेत्रीला मिळालेल्या या प्रकारच्या भक्तिभावाची चर्चा त्या काळात सर्वत्र झाली होती.
