राज्याच्या राजकारणातून मोठी बातमी समोर आली आहे. देवगिरी बँक फसवणूक प्रकरणात शिवसेनेचे नेते तथा माजी खासदार उन्मेष पाटील यांचे नातेवाईक प्रशांत वाघ यांना अटक करण्यात आला आहे. या कारवाईमुळे चाळीसगावसह संपूर्ण जळगाव जिल्ह्यात राजकीय चर्चांना उधाण आले आहे. 5.33 कोटींच्या बँक फसवणूक प्रकरणी सहा महिन्यांपूर्वी माजी खासदार उन्मेष पाटील यांच्यासह चार जणांविरुद्ध गुन्हा दाखल झाला होता. त्यानंतर आता आर्थिक गुन्हे शाखेने सापळा रचून प्रशांत वाघ यांना चाळीसगावातून केली अटक आहे. याबाबत सविस्तर माहिती जाणून घेऊयात.
उन्मेष पाटील यांच्यासह चार जणांविरुद्ध गुन्हा दाखल
देवगिरी नागरी सहकारी बँकेच्या चाळीसगाव शाखेची तब्बल 5 कोटी 33 लाख रुपयांची फसवणूक केल्याप्रकरणी फरार असलेला संशयित आरोपी प्रशांत वाघ याला पोलिसांनी सापळा रचून अटक केली आहे. या प्रकरणात शिवसेना शिंदे गटाचे नेते माजी खासदार उन्मेष पाटील यांच्यासह चार जणांविरुद्ध गुन्हा दाखल आहे. उमंग व्हाईट गोल्ड प्रायव्हेट लिमिटेड कंपनीच्या नावावरील औद्योगिक कर्ज थकीत झाल्यानंतर बँकेत गहाण असलेली मशिनरी संगनमताने विकल्याचा आरोप आहे. या व्यवहारामुळे बँकेचे मोठे आर्थिक नुकसान झाल्याचे सांगितले जात आहे.
प्रशांत वाघ यांना अटक
चाळीसगाव शहर पोलिसांनी गोपनीय माहितीच्या आधारे प्रशांत वाघ यांना ताब्यात घेत आर्थिक गुन्हे शाखेकडे सोपवले. न्यायालयाने त्यांना 4 दिवसांची पोलिस कोठडी सुनावली आहे. दरम्यान प्रशांत वाघ शिवसेना शिंदे गटाचे नेते तथा माजी खासदार उन्मेष पाटील यांचे नातेवाईक आहेत. त्यामुळे या घटनेने चाळीसगावसह जिल्ह्याच्या राजकीय वर्तुळात खळबळ उडाली आहे. या अटकमुळे उन्मेश पाटील यांच्या अडचणीत वाढ होण्याची शक्यता आहे.
आणखी काही नावे समोर येण्याची शक्यता
प्रशांत वाघ हे माजी खासदार उन्मेष पाटील यांचे नातेवाईक असल्याने या प्रकरणाला अधिक राजकीय रंग चढला आहे. आर्थिक गुन्हे शाखा आता मशिनरी विक्रीची प्रक्रिया आणि संबंधित व्यक्तींमधील आर्थिक व्यवहारांची सखोल चौकशी करत आहे. त्यामुळे येत्या काही दिवसांत या प्रकरणात आणखी धक्कादायक खुलासे होण्याची शक्यता व्यक्त केली जात आहे. त्यामुळे उन्मेष पाटील यांत्यासह प्रशांत वाघ आणि त्यांच्या इतर सहकाऱ्यांची अडचण वाढण्याची शक्यता आहे.
