पुण्यातून एक धक्कादायक बातमी समोर येत आहे. खडकवासला गावात एका भरधाव कारने भीषण अपघात केल्याची भयानक घटना घडली आहे. एका बेजबाबदार कार चालकाने आपल्या ताब्यातील ‘टाटा पंच’ कार भरधाव वेगाने आणि हयगयीने चालवून 6 दुचाकी आणि एका रिक्षाला जोरदार धडक दिली. या भीषण अपघातात एका ४ वर्षीय चिमुरड्याचा दुर्दैवी मृत्यू झाला असून, 3 ते 4 जण गंभीर जखमी झाल्याची माहिती समोर येत आहे. मिळालेल्या माहितीनुसार, शनिवारी सायंकाळी 5.30 वाजण्याच्या सुमारास हा भयानक अपघात झाला. तर घडलेली सर्व घटना सीसीटीव्हीमध्ये कैद झाली आहे. यशराज निलेश कांबळे असं अपघातात मृत्यू झालेल्या चिमुरड्याचं नाव आहे. घटलेल्या घटनेमुळे परिसरात संतापाचं वातावरण आहे.
MH 25 BH 6489 क्रमांकाची टाटा पंच कार घेऊन चालक आणि त्याचा साथीदार खडकवासला धरण भागाकडे चालले होते. सायंकाळी साडेपाचच्या सुमारास चालकाचं कारवरील नियंत्रण सुटलं आणि त्याने रस्त्यावरील 6 दुचाकी वाहनांना आणि एका रिक्षाला धडक दिली. या वाहनांना धडक देऊन कार थेट रस्त्याच्या विरुद्ध बाजूच्या दुकानात घुसली. ही धडक इतकी भीषण होती की, यामध्ये दुचाकी वाहनांचे आणि रिक्षाचे प्रचंड नुकसान झालं आहे. तसेच 3 ते 4 नागरिक गंभीर जखमी झाल्याची माहिती देखील समोर येत आहे.
अपघातात गंभीर जखमी झालेल्या 4 वर्षांच्या यशराज कांबळे याला तातडीने सिंहगड रोडवरील जगताप रुग्णालयात उपचारासाठी दाखल करण्यात आलं होतं. मात्र, उपचार सुरू असतानाच सायंकाळी 6.40 वाजण्याच्या सुमारास त्याची प्राणज्योत मालवली. यशराज याच्या दुर्दैवी निधनामुळे कुटुंबियांवर मोठा दुःखाचा डोंगर कोसळला आहे.
घडलेल्या अपघातानंकप पोलिसांनी कार चालत अमोल गोरक्षनाथ गेगडे याला अटक केली आहे आणि मिळालेल्या माहितीनुसार, तो शेतीचा व्यवसाय करतो. अमोल याचा मित्र प्रकाश तात्याराम कोठारे याला देखील पोलिसांनी ताब्यात घेतलं आहे. याया दोघांची वैद्यकीय तपासणी करण्यासाठी त्यांना पुण्यातील ससून हॉस्पिटलमध्ये पाठवण्यात आलं आहे.
घटनेची माहिती मिळताच पोलिसांनी तातडीने घटनास्थळी धाव घेतली. पोलिसांनी घटनास्थळाचा पंचनामा केला असून, आरोपी चालकाविरुद्ध गुन्हा दाखल करण्याची कारवाई सुरू केली..पुढील तपास नांदेड पोलीस स्टेशनचे वरिष्ठ पोलीस निरीक्षक अतुल भोस यांच्या मार्गदर्शनाखाली करण्यात येत आहे.
