ठाण्यातील ज्युपिटर हॉस्पिटलच्या बाहेर धक्कादायक घटना घडली. एका परप्रांतीय ओला चालकाने किरकोळ कारणावरून थेट एका वृद्ध व्यक्तीला बेदम मारहाण केली. या घटनेचा व्हिडीओ सोशल मीडियावर व्हायरल झाला. ही घटना सायंकाळच्या वेळी घडली. वृद्ध व्यक्ती आणि ओला चालक यांच्यात वाद झाला. त्यानंतर ओला चालकाने थेट त्या वृद्ध व्यक्तीला धक्का दिला, त्याच्या कानात लगावली आणि थेट जमिनीवर पाडले. तो ओला चालक फक्त तितक्यावरच थांबला नाही तर तो वृद्ध व्यक्ती जमिनीवरही पडल्यानंतरही तो त्याला मारत होता. एका वृद्ध महिलेने वाचवण्याचा प्रयत्न देखील केला. मात्र, तो ओला चालक कोणाचेही ऐकत नव्हता. काही लोकांनी या ओला चालकाला थांबवण्याचा प्रयत्नही केला. मात्र तो कोणाचेही ऐकण्यास तयार नव्हता. लोकांनी त्याला पकडून ठेवले तरीही त्याचे हात चालत होते. वृद्ध व्यक्तीला त्याने शिवीगाळही केला.
व्हायरल होणाऱ्या व्हिडीओनंतर लोकांमध्ये संतापाचे वातावरण बघायला मिळाले. या ओला चालकावर कोणत्याही परिस्थितीमध्ये कारवाई केली जावी, ही मागणी केली जात होती. यादरम्यानच उपमुख्यमंत्री एकनाथ शिंदे यांनी थेट ठाण्याच्या पोलिस आयुक्तांना या प्रकरणात कारवाई करण्याबाबत फोन केला. या ओला चालकावर कारवाई करण्याची मागणी जनतेतून होत होती.
यादरम्यानच मनसेचे अध्यक्ष राज ठाकरे यांनी ठाण्यात मारहाण झालेल्या वृद्ध व्यक्तीला फोनवरून संवाद साधला. अविनाश जाधव यांनी वृद्ध व्यक्ती आणि राज ठाकरेंचा संवाद करून दिला. ठाण्यातील प्रकरणात मनसेचे नेते अविनाश जाधव आक्रमक भूमिका घेत आहेत. यादरम्यानच आता थेट राज ठाकरे यांनी मारहाण झालेल्या वृद्ध व्यक्तीसोबत संवाद साधला आहे.
आरोपी चालकाविरोधात कलम 307 अंतर्गत गुन्हा दाखल करण्याचे निर्देश उपमुख्यमंत्री एकनाथ शिंदे यांनी दिले होते. ठाणे पोलिसांनी आरोपीचा शोध सुरू केला असून पुढील तपास वेगाने सुरू आहे. मात्र, या घटनेनंतर लोकांमध्ये संतापाचे वातावरण बघत आहे. पुन्हा एकदा परप्रातीयांचा मुद्दा चर्चेत आला. परप्रातीयांची दादागिरी वाढल्याचे सांगितले जात आहे.
