काश्मीरमध्ये ‘ऑपरेशन लोटस’चा मोठा प्लॅन,’भाजपकडून आमचे आमदार फोडण्याचा प्रयत्न’; मुख्यमंत्री उमर अब्दुल्ला यांचा गंभीर आरोप | राष्ट्रीय बातम्या

सुरुवातीला पैशांचे आमिष आणि मंत्रिपदाची ऑफर देऊन नेशनल कॉन्फरन्सचे आमदार फोडण्याचा प्रयत्न झाला. मात्र त्याला यश न आल्याने आता वेगळ्याच पद्धतीने आमदारांशी संपर्क साधला जात आहे. काही आमदारांना आमच्यासोबत या, आम्ही तुम्हाला जम्मू-काश्मीरला राज्याचा दर्जा मिळवून देऊ, असे आश्वासन दिले जात असल्याचा दावा अब्दुल्ला यांनी केला.

मुख्यमंत्र्यांनी सांगितले की, जम्मू विभागातील नेशनल कॉन्फरन्सच्या एका आमदाराने त्यांना स्वतः ही माहिती दिली आहे. त्या आमदाराला भाजपच्या एका पदाधिकाऱ्याने संपर्क साधला. संबंधित व्यक्ती सर्वोच्च न्यायालयातील वकीलही असल्याचा दावा त्यांनी केला. त्या आमदाराला भाजपमध्ये येण्यासाठी 20 ते 30 कोटी रुपये, मंत्रिपद आणि जम्मू-काश्मीरला राज्याचा दर्जा मिळवून देण्याचे आश्वासन देण्यात आल्याचा आरोप त्यांनी केला.

उमर अब्दुल्ला यांनी स्पष्ट शब्दांत सांगितले की, नेशनल कॉन्फरन्सचे आमदार कोणत्याही परिस्थितीत स्वतःला विकणार नाहीत. आमच्या पक्षातील एकही आमदार 20 कोटी, 30 कोटी किंवा 100 कोटी रुपयांसाठी आपली निष्ठा विकणार नाही. आम्हाला शेवटी देवासमोर उत्तर द्यायचे आहे, याची जाणीव आम्हा सर्वांना आहे.

भाजपवर टीका करताना उमर अब्दुल्ला म्हणाले की, मागच्या दाराने सत्ता मिळवता येईल, असा गैरसमज करू नका. आमचा पक्ष इतका कमकुवत नाही. त्यांनी कार्यकर्त्यांना पक्षाशी एकनिष्ठ राहण्याचे आवाहन करत नेशनल कॉन्फरन्स मजबूत असल्याचा दावा केला.