Pune Rain Alert: मुंबईत पावसाची एन्ट्री; आता नंबर पुण्याचा, पुणेकरांना कधी घेता येणार मान्सूनच्या सरींचा आनंद? हवामान विभागने दिवसच सांगितला | पुणे बातम्या (Pune News)

हवामान खात्याने वर्तवलेल्या ताज्या अंदाजानुसार, पुढील दोन दिवसांत पुण्याच्या तापमानात मोठी घट होण्यास सुरुवात होईल. हवामान विभागाचे माजी प्रमुख कृष्णानंद होसाळीकर यांनीही सोशल मीडियावर माहिती देताना सोमवारपासून मुंबईसह पुण्यात चांगल्या पावसाची शक्यता व्यक्त केली आहे. वेगवेगळ्या हवामान मॉडेल्सनुसार, मान्सूनच्या पुढील प्रवासासाठी सध्या वातावरणात अत्यंत पोषक बदल होत आहेत.

रविवारी सकाळपासूनच दक्षिण मुंबईसह संपूर्ण उपनगरांमध्ये पावसाने संततधार सुरू केली आहे. हवामान खात्याने २० जूननंतर राज्यात पावसाचा जोर वाढेल असा अंदाज दिला होता. त्यानुसारच मुंबईत पाऊस दाखल झाला असून हवेत गारवा निर्माण झाला आहे. दरम्यान, प्रादेशिक हवामान केंद्राने सोमवारपासून मुंबई, ठाणे आणि पुणे परिसरासाठी मेघगर्जनेसह पावसाचा ‘यलो अलर्ट’ जारी केला आहे. २३ जूनपासून संथावलेला मान्सून पुन्हा गती घेणार असल्याने संपूर्ण महाराष्ट्राला मोठा दिलासा मिळणार आहे.