पुणे : पुणे जिल्ह्यातील सणसवाडी औद्योगिक क्षेत्रातून एक अत्यंत धक्कादायक आणि खळबळजनक घटना समोर आली आहे. एका कंपनीत रात्रीची शिफ्ट सुरू असताना, सहकाऱ्याने केलेल्या अत्यंत संतापजनक कृत्यामुळे एका ४२ वर्षीय कामगाराला आपला जीव गमवावा लागला आहे. कॉम्प्रेसरचा उच्च दाबाचा (High Pressure) पाईप पीडित कामगाराच्या गुदद्वारात घालण्यात आल्याने त्यांच्या पोटात मोठ्या प्रमाणावर हवा भरली आणि उपचारादरम्यान त्यांचा दुर्दैवी मृत्यू झाला. या प्रकरणी शिक्रापूर पोलीस ठाण्यात गुन्हा दाखल करण्यात आला आहे.
Pune Crime News : पहाटेच्या सुमारास घडला धक्कादायक प्रकार
या घटनेप्रकरणी संतोषकुमार किशोर यादव (वय ३२) यांनी पोलिसांत अधिकृत फिर्याद दिली आहे. पोलिसांच्या माहितीनुसार, ३० जून २०२६ रोजी पहाटे पाच वाजेच्या सुमारास सणसवाडी येथील ‘वेस्टर्न इंडिया फोर्ज प्रा. लि.’ या कंपनीत हा प्रकार घडला. आरोपी बिकीकुमार भाईलाल सरोज याने फिर्यादीचे मेहुणे नरेश सुलेंद्र यादव (वय ४२, मूळ रा. गया, बिहार) यांच्याशी कामाच्या ठिकाणी हे जीवघेणे कृत्य केले.
Pune Crime News : उपचारादरम्यान मृत्यू; आरोपीवर गुन्हा दाखल
आरोपी बिकीकुमार याने नरेश यांच्या गुदद्वारात कॉम्प्रेसरचा पाईप लावल्याने अत्यंत वेगाने हवा पोटात गेली, ज्यामुळे नरेश यांची प्रकृती झपाट्याने बिघडली आणि ते जागीच कोसळले. त्यांना तातडीने गंभीर अवस्थेत जवळच्या रुग्णालयात उपचारासाठी हलवण्यात आले होते. मात्र, पोटातील अंतर्गत अवयवांना गंभीर इजा झाल्याने उपचारादरम्यान त्यांचा मृत्यू झाला. या प्रकरणी शिक्रापूर पोलिसांनी तक्रारीवरून आरोपीविरुद्ध गुन्हा नोंदवला आहे.
Pune Crime News : औद्योगिक सुरक्षा आणि व्यवस्थापनावर मोठे प्रश्नचिन्ह
थेट कंपनीच्या आवारात आणि कामाचे तास सुरू असताना घडलेल्या या विचित्र घटनेमुळे औद्योगिक क्षेत्रातील कामगारांच्या सुरक्षेचा मुद्दा पुन्हा एकदा ऐरणीवर आला आहे. कंपनीमधील अंतर्गत सुरक्षा नियम, कामगारांवर असणारे पर्यवेक्षण (Supervision) आणि व्यवस्थापनाची देखरेख यावर आता गंभीर प्रश्न उपस्थित केले जात आहेत.
Pune Crime News : पोलीस तपासाची दिशा
या संपूर्ण प्रकरणाचा तपास शिक्रापूर पोलीस ठाण्याचे सहाय्यक पोलीस निरीक्षक संतोष कारंडे करत आहेत. त्यांनी दिलेल्या माहितीनुसार, “आरोपीने नेमक्या कोणत्या कारणातून किंवा हेतूने हे कृत्य केले, याचा सखोल तपास सुरू आहे. यासोबतच, या दुर्दैवी घटनेत कंपनी प्रशासनाचा काही निष्काळजीपणा किंवा सुरक्षा नियमांचे उल्लंघन झाले आहे का, याचीही पडताळणी केली जात आहे. चौकशीअंती व्यवस्थापनाची चूक आढळल्यास त्यांच्यावरही योग्य ती कायदेशीर कारवाई केली जाईल.”
Ashwini Bhide Special Report : अश्विनी भिंडेंना शिवसेनेकडून टार्गेट, भाजप-ठाकरे गटाचा एकच सूर
