Nitish Kumar Reddy Viral Video: अफगाणिस्तानविरुद्ध पहिल्या वनडे सामन्यात टीम इंडियाने दणदणीत विजय मिळवला. या सामन्यानंतरच्या पत्रकार परिषदेत भारताचा तरुण अष्टपैलू क्रिकेटर नितीश कुमार रेड्डी माध्यमांशी बोलत असताना आईचा फोन वाजला. यानंतर आईचा फोन घेण्यासाठी नितीशने प्रेस कॉन्फरन्स थोड्या वेळासाठी थांबवली. माईकजवळ ठेवलेला फोन वाजल्यावर त्याने त्वरित माध्यमांची माफी मागितली आणि फोन उचलून आईला तेलुगू भाषेत सांगितले की, पत्रकार परिषदेत आहे आणि थोड्याच वेळात परत फोन करतो.
The post-match presser can wait but a call from Mom simply cannot 😊#TeamIndia | #INDvAFG | @IDFCFIRSTBank | @NKReddy07 pic.twitter.com/23OUBNZvYH
— BCCI (@BCCI) June 13, 2026
नितीश रेड्डीचा व्हिडिओ व्हायरल
भारतीय क्रिकेट नियामक मंडळाने (BCCI) या घटनेचा व्हिडिओ सोशल मीडियावर शेअर केला आणि त्याला कॅप्शन दिले, “मॅचनंतरची पत्रकार परिषद थांबू शकते, पण आईचा फोन नाही.” हा प्रसंग खूप व्हायरल झाला आणि त्याने अनेकांची मने जिंकली. दुसरीकडे, पावसामुळे बाधित झालेल्या सामन्यात 23 वर्षीय नितीश कुमार रेड्डीने गोलंदाजीत महत्त्वाची भूमिका बजावली. त्याने 31 धावांत रहमानउल्ला गुरबाज आणि मोहम्मद नबी यांसारखे दोन महत्त्वाचे बळी घेतले, ज्यामुळे अफगाणिस्तानला 194 धावांवर रोखता आले. हा सामना धर्मशालामधील हिमाचल प्रदेश क्रिकेट असोसिएशन स्टेडियमवर झाला.कर्णधार शुभमन गिलच्या नाबाद 84 धावांच्या शानदार खेळीच्या जोरावर भारताने 13 चेंडू राखून हा सामना 7 गडी राखून जिंकला. दरम्यान, नाणेफेक हरल्यानंतर प्रथम फलंदाजी करण्याचा निर्णय घेतलेल्या अफगाण संघाची सुरुवात खराब झाली. पॉवरप्लेमध्येच त्यांनी 26 धावांत तीन विकेट गमावल्या. पदार्पण करणाऱ्या वेगवान गोलंदाज गुरनूर ब्रारने इब्राहिम झद्रानला (1 धाव) बाद करून भारताला पहिले यश मिळवून दिले. त्यानंतर अर्शदीप सिंगने सेदिकुल्ला अटल (0 धावा) आणि रहमत शाह (3 धावा) यांना बाद केले. टीम इंडियाकडून पदार्पण केलेल्या हर्ष दुबे आणि गुरनुर ब्रार यांनी प्रत्येकी 3-3 विकेट घेत चमकदार कामगिरी केली.
अवघ्या 48 चेंडूंमध्ये विक्रमी शतक
त्यानंतर रहमानुल्ला गुरबाजने अफगाणिस्तानचा डाव सावरला. गुरबाजने अवघ्या 25 चेंडूंमध्ये आपले अर्धशतक पूर्ण केले. गुरबाजला हशमतुल्ला शाहिदीने चांगली साथ दिली आणि दोघांनी चौथ्या विकेटसाठी 116 धावांची भागीदारी केली. गुरबाजने आपले शतक पूर्ण करण्यासाठी जास्त वेळ घेतला नाही, त्याने अवघ्या 48 चेंडूंमध्ये ते पूर्ण केले. गुरबाजने 51 चेंडूंमध्ये आठ षटकार आणि आठ चौकारांसह 102 धावा केल्या. गुरबाजची विकेट नितीश कुमार रेड्डीने घेतली. त्यानंतर पदार्पण करणाऱ्या हर्ष दुबेने कर्णधार हशमतुल्ला शाहिदीला (27 धावा) बाद करून भारताला पाचवे यश मिळवून दिले. नितीश कुमार रेड्डीने मोहम्मद नबीलाही (9 धावा) बाद केले. त्यानंतर हर्ष दुबेने अझमतुल्ला उमरझाई (26 धावा) आणि अल्लाह गझनफर (0) यांच्या विकेट्स घेतल्या. शेवटच्या षटकात, गुरनूर ब्रारने रशीद खान (9) आणि झियाउर रहमान शरीफी (4) यांना बाद करून अफगाण डाव गुंडाळला.
इतर महत्वाच्या बातम्या
IPL 2026 : राजस्थान रॉयल्सने पंजाब किंग्सचा घरच्या मैदानावर पराभव करत विजयीरथ रोखला
