IAF Plane Crash: भारतीय हवाई दलाच्या विमान अपघातात 5 जणांचा मृ्त्यू; एअरक्राफ्टचे दोन तुकडे, आसाममधील घटनेनं देश हळहळला, चौकशीचे आदेश

IAF Plane Crash: भारतीय वायू दलाचे एएन-32 हे विमान आसाममधील जोरहाट येथे दुर्घटनाग्रस्त (IAF Plane Crash) झाले आहे. या अपघातामध्ये भारतीय हवाई दलाच्या एकूण 5 जणांचा मृत्यू झाल्याची माहिती समोर आली आहे. या अपघातात सह-वैमानिक बचावला असून त्याच्यावर उपचार सुरू आहेत. अपघाताचे कारण शोधण्यासाठी भारतीय हवाई दलाने चौकशीचे आदेश दिले आहेत, अशी माहिती हवाई दलाच्या अधिकाऱ्यांनी दिली. (AN-32 transport aircraft crash)

#UPDATE | Five Indian Air Force personnel have lost their lives in the air crash involving the AN-32 transport aircraft at the Jorhat air base in Assam. The co-pilot has survived and is being provided treatment. A court of inquiry has been ordered by the Indian Air Force to… https://t.co/JYX7IxmEUo pic.twitter.com/j63CEWtvQ0

— ANI (@ANI) June 13, 2026

आज (13 जून 2026) आसाममधील जोरहाट जिल्ह्यात भारतीय हवाई दलाचे एक मालवाहू विमान (ट्रान्सपोर्ट एअरक्राफ्ट) लँडिंग करताना कोसळले. सदर घटना ‘रोरिया’ (Rowriah) भागातील हवाई दल तळावर 43 व्या स्क्वॉड्रनचे ‘एएन-32’ (AN-32) विमान उतरत असताना घडली. या विमानात माल (कार्गो) भरलेला होता. या घटनेचा एक व्हिडीओही समोर आला आहे, ज्यामध्ये विमान कोसळल्यानंतर त्याचे दोन तुकडे होताना आणि त्यानंतर त्याला आग लागताना दिसत आहे. भारतीय हवाई दलाने (IAF) अपघाताच्या वृत्ताला दुजोरा दिला असून, घटनास्थळावरील परिस्थितीचा बारकाईने आढावा घेतला जात असल्याचे आणि नवीन माहिती समोर येताच तपशील दिले जातील असे स्पष्ट केले आहे. हवाई दलाने या अपघाताचे नेमके कारण शोधण्यासाठी अधिकृत चौकशी सुरू केली आहे. पुढील माहितीची प्रतीक्षा आहे.

अपघातात सह-वैमानिक बचावला- (IAF Plane Crash)

भारतीय हवाई दलाच्या अधिकाऱ्यांनी सांगितले की, या अपघातात सह-वैमानिक बचावला असून सध्या त्याच्यावर उपचार सुरू आहेत. या घटनेनंतर, हवाई दलाने अपघाताचे कारण शोधण्यासाठी चौकशी समिती स्थापन करण्याचे आदेश दिले आहेत. मिळालेल्या माहितीनुसार, अपघाताच्या वेळी हे विमान अरुणाचल प्रदेशातून जोरहाटच्या दिशेने जात होते.

‘एएन-32’ हे रशियन बनावटीचे दोन इंजिन असलेले विमान- (IAF Plane Crash)

सोव्हिएत बनावटीचे ‘एएन-32’ हे दोन इंजिन असलेले ‘टॅक्टिकल ट्रान्सपोर्ट’ (लष्करी मालवाहू) विमान आहे. ईशान्य आणि हिमालयीन सीमांवरील दुर्गम भूप्रदेश आणि उंचावरील भागांमध्ये हवाई दलासाठी हे विमान अनेक दशकांपासून अत्यंत महत्त्वाचे साधन ठरले आहे. या घटनेमुळे या विमानाचा कार्यान्वित राहण्याचा इतिहास पुन्हा एकदा चर्चेत आला आहे.

गेल्या काही वर्षांत ‘एएन-32’ विमानांचे अनेक अपघात- (IAF Plane Crash)

जून 2019 मध्ये जोरहाट हवाई दल तळावरून अरुणाचल प्रदेशातील मेचुकाकडे निघालेले हवाई दलाचे ‘एएन-32’ विमान बेपत्ता झाले होते; या विमानात 13 जण प्रवास करत होते. मोठ्या प्रमाणावर राबवण्यात आलेल्या शोध मोहिमेनंतर, अरुणाचल प्रदेशातील डोंगराळ भागात या विमानाचे अवशेष सापडले आणि त्यातील सर्व 13 जणांना मृत घोषित करण्यात आले. तसेच, जुलै 2016 मध्ये चेन्नईहून पोर्ट ब्लेअरला जाणारे आणखी एक ‘एएन-32’ विमान बंगालच्या उपसागरावरून उड्डाण करत असताना बेपत्ता झाले होते; या विमानात 29 जण होते. भारताच्या सर्वात मोठ्या शोध मोहिमांपैकी एक मोहीम राबवूनही हे विमान अनेक वर्षे सापडले नाही आणि त्यातील सर्व प्रवाशांना मृत मानण्यात आले.