Nikhil Chaudhary : श्वास रोखणारी मॅच! 6 बॉलमध्ये 6 रन्सची गरज, बॉलरची हॅट्रिक, कॅमेरा फोडला अन् शेवटच्या बॉलवर सिक्स, अंगावर काटा येणारा Video | क्रीडा बातम्या (Sports News in Marathi)

वॉशिंग्टन फ्रिडम संघाला विजयासाठी 6 बॉल्समध्ये केवळ 6 रन्सची गरज होती आणि हातामध्ये 4 विकेट्स शिल्लक होत्या. मैदानावरील परिस्थिती पाहता वॉशिंग्टन हा सामना सहज जिंकणार असेच वाटत होते. कॅप्टन फाफ डुप्लेसिसने शेवटची ओव्हर टाकण्याची जबाबदारी वेस्ट इंडिजच्या अकील हुसेनवर सोपवली आणि इथूनच एका महानाट्याला सुरुवात झाली अन् एक दोन नाही तर तीन मोठ्या घटना घडल्या.

अकील हुसेनने ओव्हरचा पहिला बॉल टाकला, ज्यावर मार्को यानसेनला एकही रन काढता आला नाही. यामुळे वॉशिंग्टनवरील दबाव वाढला. दुसऱ्याच बॉलवर अकीलने मोठा शॉट खेळण्याच्या प्रयत्नात असलेल्या यानसेनला थेट बाद केले. यानसेन आउट झाल्यानंतर मैदानात आलेला अपोन्सो देखील अकीलच्या फिरकीच्या जाळ्यात अडकला आणि तिसऱ्या बॉलवर झेल देऊन पॅव्हेलियनमध्ये परतला. सलग दोन विकेट्स पडल्यामुळे सामन्यातील रंजकतेमध्ये कमालीची वाढ झाली होती.

अकील हुसेन एवढ्यावरच थांबला नाही. त्याने चौथ्या बॉलवर आसिफ महमूदला देखील बाद करून मैदानावर खळबळ उडवून दिली. अकीलने शानदार हॅट्ट्रिक पूर्ण केली होती आणि वॉशिंग्टनने सलग तीन बॉल्सवर तीन विकेट्स गमावल्या होत्या. अचानक संपूर्ण सामना टेक्सास सुपर किंग्सच्या बाजूने झुकला होता. अकीलचा हा थरार नॉन-स्ट्रायकर एंडवर उभा असलेला निखिल चौधरी अत्यंत जवळून पाहत होता, जो 18 बॉल्सवर 21 रन्स करून खेळत होता.