भारतात पाकिस्तानी कलाकारांवर बंदी असली तरी त्यांची लोकप्रियता आजही कमी झालेली नाही. अनेक पाकिस्तानी कलाकारांचे चाहते भारतात मोठ्या प्रमाणात आहेत. सध्या पाकिस्तानी अभिनेत्री कुब्रा खान चर्चेत आली असून तिच्या वाढदिवसाच्या सेलिब्रेशनचे फोटो आणि व्हिडिओ सोशल मीडियावर मोठ्या प्रमाणात व्हायरल होत आहेत.
पाकिस्तानमधील लोकप्रिय अभिनेत्री कुब्रा खान हिने 16 जून रोजी तिचा 33 वा वाढदिवस साजरा केला. वाढदिवसानिमित्त ती लंडनमध्ये गेली होती. याच दरम्यान अभिनेत्री सारा अली खान आणि तिची आजी, ज्येष्ठ अभिनेत्री शर्मिला टागोर यांची कुब्रासोबत भेट झाली. त्यानंतर या तिघींनी मिळून एका खास रेस्टॉरंटमध्ये कुब्राचा वाढदिवस साजरा केला.
साराचा कुब्रा खानसोबतचा व्हिडीओ चर्चेत
सोशल मीडियावर व्हायरल झालेल्या व्हिडिओमध्ये सारा अली खान, शर्मिला टागोर आणि कुब्रा खान एका रेस्टॉरंटमध्ये एकत्र बसलेल्या दिसत आहेत. यावेळी आणखी एक व्यक्ती त्यांच्यासोबत उपस्थित होती. वाढदिवसाच्या केक कटिंगदरम्यान उपस्थित सर्वांनी कुब्रासाठी टाळ्या वाजवत शुभेच्छांचा वर्षाव केला. विशेष म्हणजे, शर्मिला टागोर यांनी स्वतःच्या हाताने कुब्रा खानला केक भरवला. या खास क्षणाचा व्हिडिओ चाहत्यांच्या पसंतीस उतरला आहे.
कुब्रा खान ही पाकिस्तानच्या टेलिव्हिजन विश्वातील एक प्रसिद्ध अभिनेत्री आहे. तिने ‘नूर जहां’, ‘मेरी तन्हाई’ आणि ‘संग-ए-माह’ यांसारख्या लोकप्रिय मालिकांमध्ये काम केले आहे. विशेषतः ‘संग-ए-माह’ या मालिकेला प्रेक्षकांनी भरभरून प्रतिसाद दिला होता. सध्या ती ‘डॉक्टर बहू’ या पाकिस्तानी मालिकेत झळकत असून तिच्या भूमिकेचेही प्रेक्षकांकडून कौतुक होत आहे.
Kubra Khan celebrates her birthday with Bollywood actresses Bollywood’s Pataudi Family, Sharmila Tagore and Sara Ali Khan.#KubraKhan #SaraAliKhan #SharmilaTagore #Bollywood #Lollywood pic.twitter.com/UiqDatn5Je
— Lollywood Pictures (@LollyPictures) June 22, 2026
साराचा कामातून थोडा ब्रेक
दुसरीकडे, सारा अली खान सध्या कामातून थोडा ब्रेक घेत लंडनमध्ये सुट्ट्यांचा आनंद घेत आहे. काही काळापूर्वी ती ‘पति पत्नी और वो 2’ या चित्रपटात दिसली होती. या चित्रपटात तिच्यासोबत आयुष्मान खुराना, वामिका गब्बी आणि रकुल प्रीत सिंह यांनी महत्त्वाच्या भूमिका साकारल्या होत्या. बॉक्स ऑफिसवर चित्रपटाला अपेक्षित यश मिळाले नसले तरी सारा अली खानच्या अभिनयाचे मात्र प्रेक्षक आणि समीक्षकांनी कौतुक केले होते.
दरम्यान, कुब्रा खान, सारा अली खान आणि शर्मिला टागोर यांच्या या अनपेक्षित भेटीची सोशल मीडियावर जोरदार चर्चा रंगली असून, त्यांच्या एकत्रित उपस्थितीने चाहत्यांचे विशेष लक्ष वेधून घेतले आहे.
