Yashasvi Jaiswal vs Asitha Fernando Ind vs SL 2nd Test : भारत आणि श्रीलंका यांच्यातील कोलंबो कसोटीच्या पहिल्याच सत्रात वातावरण तापलं. भारताचा सलामीवीर यशस्वी जैस्वाल अर्धशतकाच्या जवळ पोहोचला असताना श्रीलंकेचा वेगवान गोलंदाज असिथा फर्नांडोने त्याला बोल्ड केलं. मात्र, विकेट घेतल्यानंतर फर्नांडोने केलेल्या आक्रमक सेलिब्रेशननंतर यशस्वी आणि फर्नांडो यांच्यात मैदानावरच शाब्दिक बाचाबाची झाली. दोघेही एकमेकांच्या अगदी जवळ गेले आणि काही क्षणांसाठी परिस्थिती तणावपूर्ण बनली. ज्याचे व्हिडिओ आता सोशल मीडियावर व्हायरल होत आहे.
कोलंबोतील एसएससी स्टेडियमवर भारत आणि श्रीलंका यांच्यात दुसऱ्या कसोटीला सुरुवात झाली आहे. गॉलमध्ये झालेल्या पहिल्या कसोटीत भारताने श्रीलंकेचा पराभव करत दोन सामन्यांच्या मालिकेत 1-0 अशी आघाडी घेतली आहे. त्यामुळे श्रीलंकेसाठी ही कसोटी मालिका वाचवण्यासाठी अत्यंत महत्त्वाची आहे, तर भारताचे लक्ष्य दुसरा सामना जिंकून मालिकेवर कब्जा करण्यासोबतच जागतिक कसोटी अजिंक्यपदाच्या अंतिम फेरीच्या शर्यतीत आपली स्थिती मजबूत करण्याचे आहे.
Body contact between Jaiswal and Asitha Fernando.. #SLVIND pic.twitter.com/w3Q905WUIf
— Nibraz Ramzan (@nibraz88cricket) August 23, 2026
राहुलनंतर यशस्वीही तंबूत (Ind vs SL 2nd Test Update)
भारताला सुरुवातीलाच मोठा धक्का बसला. 11व्या षटकाच्या चौथ्या चेंडूवर लाहिरू कुमारा याने केएल राहुलला बाद केलं. राहुलने कटचा फटका खेळण्याचा प्रयत्न केला, मात्र चेंडूला त्याच्या बॅटची कड लागली आणि यष्टिरक्षक निरोशन डिकवेलाने झेल घेतला. राहुल 33 चेंडूंमध्ये 18 धावा करून माघारी परतला. भारताची पहिली विकेट 37 धावांवर पडली. यानंतर यशस्वी जैस्वालने डाव सावरण्याचा प्रयत्न केला. तो आक्रमक फलंदाजी करत होता आणि अर्धशतकाच्या दिशेने वाटचाल करत होता. मात्र, असिथा फर्नांडोने त्याचा डाव संपवला. यशस्वी 53 चेंडूंमध्ये 45 धावा करून बाद झाला. त्याच्या खेळीत तब्बल 9 चौकारांचा समावेश होता. फर्नांडोने त्याला बाद केल्यानंतर जोरदार सेलिब्रेशन करत यशस्वीला सेंडऑफ दिला.
विकेटनंतर मैदानावरच वाद, नेमकं काय घडलं? (Yashasvi Jaiswal vs Asitha Fernando get fight)
यशस्वी बाद झाल्यानंतर पॅव्हेलियनच्या दिशेने निघाला असताना फर्नांडो आणि त्याच्यात काहीतरी शाब्दिक बाचाबाची झाली. दोघेही एकमेकांच्या अगदी जवळ गेले. काही क्षण तर दोघांचे चेहरे एकमेकांसमोर आले आणि हेड-टू-हेड होण्याची परिस्थिती निर्माण झाली. दोघांनीही रागाच्या भरात एकमेकांना काही शब्द सुनावले. वातावरण चांगलेच तापले होते. प्रकरण आणखी वाढण्याची शक्यता निर्माण झाल्यानंतर श्रीलंकेच्या कर्णधाराने हस्तक्षेप करत दोघांना शांत करण्याचा प्रयत्न केला.
दोन्ही सलामीवीर पहिल्याच सत्रात माघारी
फर्नांडोने यशस्वीला बाद केल्याने भारताचे दोन्ही सलामीवीर पहिल्याच सत्रात पॅव्हेलियनमध्ये परतले. राहुलला 18 धावांवर लाहिरू कुमाराने बाद केलं, तर यशस्वीचा 45 धावांवर फर्नांडोने त्रिफळा उडवला. यशस्वीला बाद करताना फर्नांडोने सामन्यात पुनरागमन केलं. यशस्वीने त्याच्या गोलंदाजीवर तीन चौकार मारले होते. मात्र, निर्णायक क्षणी फर्नांडोने आत येणारा चेंडू टाकत सेट झालेल्या फलंदाजाचा त्रिफळा उडवला.
हे ही वाचा –
