फिरायला अनेकांना आवडतं. कुटुंबासोबत मित्रांसोबत आपण कायम फिरायला जात असतो. पण फिरायला जात असताना देखील काही महत्त्वाच्या गोष्टींकडे लक्ष देणं अत्यंत महत्त्वाचं असतं. लोक जेव्हा प्रवासाला जातात, तेव्हा ते प्रामुख्याने हॉटेलमध्ये राहतात. हॉटेलच्या खोलीत प्रवेश करताच जवळपास प्रत्येकजण लाईट स्विच चालू करतात. मात्र, सुरक्षिततेच्या दृष्टीने ही सवय तुम्हाला संकटात आणू शकते. खोलीत प्रवेश करताच लाईट चालू करण्याऐवजी काही महत्त्वाच्या गोष्टींची आधी तपासणी करावी, याची जाणीव फार कमी लोकांना असते.
तज्ज्ञांच्या मते, हॉटेलच्या खोलीत प्रवेश केल्यावर सर्वात आधी काही क्षण दाराजवळ थांबून संपूर्ण खोलीचं बारकाईने निरीक्षण करा. हे अत्यंत महत्त्वाचं आहे. यामुळे खोलीतील सर्व गोष्टी व्यवस्थित आहेत की नाही, हे ठरवण्यास तुम्हाला मदत होईल. जर तुम्ही हॉटेल्समध्ये राहत असाल, तर खोलीत प्रवेश करताच कोणत्या गोष्टी करु नये याबद्दल काही महत्त्वाचे मुद्दे जाणून घ्या…
हॉटेलच्या खोलीत प्रवेश केल्यास लाईट्स का लावू नयेत?
खोलीत अंधार असल्यास, छुप्या कॅमेऱ्याचा छोटा एलईडी किंवा लुकलुकणारा इंडिकेटर सहज दिसतो. म्हणूनच, लगेच लाईट लावण्याऐवजी, आधी खोलीची पूर्णपणे तपासणी करणं तुमच्या कुटुंबियांसाठी अधिक योग्य असेल.
त्यानंतर, खोलीतील दरवाजे, खिडक्या, कपाटे, बाथरूम, बाल्कनी आणि पलंगाखालची जागा यांची नीट तपासून घ्या. जर तुम्हाला काही संशयास्पद किंवा असामान्य आढळलं, तर त्वरित हॉटेलच्या कर्मचाऱ्यांना कळवा.
तसेच, पांढऱ्या चादरींवर ढेकूण सहजपणे दिसतात, अगदी अंधारातही. खोलीत प्रवेश करताच पलंग, उश्या, चादरी, पडदे आणि फर्निचरचे कोपरे काळजीपूर्वक तपासा. जर तुम्हाला ढेकूण दिसले, तर त्वरित खोली बदलून मागून घ्या.
जेव्हा तुम्ही एखाद्या अंधाऱ्या खोलीत काही वेळ घालवता, तेव्हा तुमचे डोळे हळूहळू त्या वातावरणाशी जुळवून घेतात; यामुळे सूक्ष्म हालचाली, सावल्या किंवा असामान्य वस्तू ओळखणं सोपं जातं. मात्र, खोलीत प्रवेश करताच जर तुम्ही लाईट्स लावल्या, तर अशा गोष्टी तुमच्या नजरेतून सुटू शकतात. म्हणूनच, पुढच्या वेळी जेव्हा तुम्ही हॉटेलच्या खोलीत जाल, तेव्हा लाईट्स लावण्यापूर्वी त्या खोलीची नीट पाहणी करा.
