आजकाल क्रिकेट विश्वात वैभव सूर्यवंशी हे नाव सर्वाधिक चर्चेत आहे. आयपीएल आणि देशांतर्गत क्रिकेटमध्ये आपली छाप पाडल्यानंतर, वैभव आता आंतरराष्ट्रीय पदार्पणासाठी सज्ज झाला आहे. तो सध्या इंग्लंडच्या दौऱ्यावर आहे. आयर्लंडविरुद्ध मालिकेत वैभवला पदार्पणाची संधी मिळाली नाही तर असे वाटले होते की इंग्लंडविरुद्ध मिळेल, पण वैभवला पहिल्या सामन्यात तरी संधी मिळालेली नाही आता उर्वरित सामन्यात तरी संधी मिळते की नाही हे पाहणं महत्वाचं ठरणार आहे. पण आता सर्वत्र वैभवचे कौतुक होत असताना एका माजी क्रिकेटपटूच्या विधानाने खळबळ झाली आहे.
क्रिकइन्फोसाठी लिहिलेल्या एका स्तंभात कलिनान यांनी लिहिले, “वैभव सूर्यवंशीमध्ये आपल्याला केवळ आपल्या वयापेक्षा अधिक प्रगल्भ खेळणारा एक प्रतिभावान मुलगा दिसत नाही. क्रिकेटने यापूर्वी असे काहीही पाहिले नाही. एक असे मूल जे आतापर्यंतच्या सर्वात व्यावसायिकदृष्ट्या शक्तिशाली, जागतिक स्तरावर प्रसिद्ध आणि सामाजिकदृष्ट्या संवेदनशील क्रीडा वातावरणाच्या केंद्रस्थानी आहे: भारतीय क्रिकेट आणि आयपीएल.”
गंभीर चिंतनाची गरज
ते म्हणाले, “क्रिकेटने अनेक अपवादात्मक प्रतिभावान खेळाडू घडवले आहेत. असेही तरुण खेळाडू आहेत ज्यांना खूप लहान वयातच ओळख मिळाली आणि त्यांना असे खेळाडू म्हणून ओळख मिळाली, जे त्यांना कधीच व्हायचे नव्हते. पण निरागसता, अपवादात्मक प्रतिभा आणि सोशल मीडियाच्या जगाने एका लहान मुलापासून लाखो लोकांच्या मतांपर्यंतचे अंतर जवळजवळ मिटवून टाकले आहे. सूर्यवंशी 15 वर्षांचा आहे आणि त्याचे आयुष्य वाढत्या वयाच्या सामान्य गतीने पुढे जात नाहीये. खूप उशीर होण्यापूर्वी यावर गंभीर विचार करणे आवश्यक आहे. माझ्या मते, त्याने घरी राहून परीक्षेची तयारी करावी, मित्रांसोबत गल्ली क्रिकेट खेळावे आणि जोपर्यंत शक्य आहे तोपर्यंत एका सामान्य मुलासारखे जगावे. याचा अर्थ असा नाही की त्याच्या प्रतिभेकडे दुर्लक्ष केले पाहिजे. याचा अर्थ असा आहे की, प्रतिभा असलेल्या व्यक्तीला ती पूर्णपणे विकसित करण्याची संधी मिळाली तरच तिच्या योग्य वापराचा उपयोग होऊ शकतो.”
वैभवने धुमाकूळ घातला
वैभव सूर्यवंशी आयपीएल 2026 मध्ये सर्वाधिक धावा करणारा फलंदाज होता. त्याने 16 डावांमध्ये 48.50 च्या सरासरीने आणि 237.31च्या स्ट्राइक रेटने 776 धावा केल्या. या काळात वैभवने 63 चौकार आणि 72 षटकार मारले. त्याने 5 अर्धशतके आणि एक शतकही झळकावले. या कामगिरीमुळे त्याला भारतीय संघात स्थान मिळाले.
