बॉलिवूड आणि क्रिकेट हे काही वेगळे नाही. शाहरुख खान आणि प्रीती झिंटा तर आयपीएलमधील संघाचे मालक आहे. अभिनेता जॉन अब्राहमने क्रिकेटच्या जगात एक मोठी एन्ट्री केली आहे. तो आता युरोपियन टी20 प्रीमियर लीग फ्रँचायझी, रॉटरडॅम डॉकर्सचा सह-मालक बनला आहे. त्याच्या प्रवेशामुळे संघाच्या मालकी गटात आता क्रिकेटमधील दिग्गज जॉन्टी ऱ्होड्स, फॅफ डु प्लेसिस, हेनरिक क्लासेन आणि व्यवस्थापकीय भागीदार मधुकर श्री यांचा समावेश झाला आहे. युरोपियन टी20 प्रीमियर लीगचा पहिला हंगाम 26 ऑगस्ट ते 20 सप्टेंबर दरम्यान खेळला जाईल. या स्पर्धेत सहा शहरांमधील फ्रँचायझी सहभागी होतील, ज्यात ग्लासगो, ॲमस्टरडॅम, एडिनबर्ग, डब्लिन, बेलफास्ट आणि रॉटरडॅम येथील संघांचा समावेश आहे. संपूर्ण स्पर्धेत एकूण 32 सामने खेळले जातील.
या लीगचा उद्देश आयर्लंड, स्कॉटलंड आणि नेदरलँड्समध्ये क्रिकेटला नव्या उंचीवर नेणे आणि खेळाच्या विकासाला गती देणे हा आहे. आयोजकांचा विश्वास आहे की युरोपमध्ये क्रिकेटच्या विस्तारात ही लीग महत्त्वाची भूमिका बजावेल. सह-मालक बनल्यानंतर जॉन अब्राहम म्हणाला की, “क्रिकेटमध्ये लोकांना जोडण्याची, प्रेरणा देण्याची आणि नवीन संधी निर्माण करण्याची शक्ती आहे. त्यांच्या मते, युरोप सध्या क्रिकेटसाठी सर्वात वेगाने वाढणाऱ्या बाजारपेठांपैकी एक आहे आणि रॉटरडॅम डॉकर्सकडे प्रबळ दूरदृष्टी, नेतृत्व आणि मोठी महत्त्वाकांक्षा आहे, ज्यामुळे फ्रँचायझीला एक वेगळी ओळख निर्माण करण्यास मदत होऊ शकते.”
ईटीपीएलचे सह-संस्थापक अभिषेक बच्चन यांनी जॉन अब्राहमचे स्वागत करताना सांगितले की, खेळाबद्दलची त्याची आवड आणि क्रीडा व्यवसायातील अनुभव रॉटरडॅम डॉकर्ससाठी एक मोठी संपत्ती ठरेल. त्यांनी विश्वास व्यक्त केला की जॉनच्या उपस्थितीमुळे संघ आणि लीग या दोघांनाही एक नवीन ओळख निर्माण करण्यास मदत होईल.
युरोपियन टी20 प्रीमियर लीगच्या विविध फ्रँचायझी गटांमध्ये अनेक दिग्गज क्रिकेटपटू सहभागी आहेत. यामध्ये स्टीव्ह वॉ, राहुल द्रविड, जॉन्टी ऱ्होड्स, मॅथ्यू हेडन, फॅफ डु प्लेसिस आणि हेनरिक क्लासेन यांसारख्या मोठ्या नावांचा समावेश आहे. परिणामी, लीगचा पहिला हंगाम सुरू होण्यापूर्वीच प्रचंड उत्साह निर्माण झाला आहे.
