वनडे वर्ल्डकप 2027 स्पर्धेत हा दिग्गज खेळाडू खेळणार नाही! कोण घेणार जागा?Image Credit source: David Davies/PA Images via Getty Images
वनडे वर्ल्डकप 2027 स्पर्धेसाठी अजून वर्षभराचा कालावधी शिल्लक आहे. मात्र त्यासाठी संघाची बांधणी आतापासून केली जात आहे. प्रत्येक खेळाडूचा परफॉर्मन्स आणि दक्षिण अफ्रिकेतील वातावरण या दृष्टीने चाचपणी केली जात आहे. असं असताना अष्टपैलू रवींद्र जडेजाबाबत एक बातमी समोर आली आहे. रिपोर्टनुसार, वनडे वर्ल्डकप 2027 स्पर्धेत त्याचं खेळणं कठीण आहे. संघ व्यवस्थापन त्याच्या नावाचा देखील विचार करत नाही. वनडे फॉर्मेटसाठी रवींद्र जडेजा निवडकर्त्यांच्या यादीत नाही, असं म्हंटलं तर वावगं ठरणार नाही. संघ व्यवस्थापनाला संघात टॉप 7 मध्ये फलंदाजी करेल अशा खेळाडूच्या शोधात आहेत. दक्षिण अफ्रिकेतील स्थिती पाहता संघ व्यवस्थापन मध्यम पेसर्स आणि अष्टपैलू खेळाडूला पसंती देऊ शकते. तर फिरकी अष्टपैलू अक्षर पटेल आधीच संघात आहे.
अक्षर पटेल रवींद्र जडेजापेक्षा भारी!
टाइम्स ऑफ इंडियाच्या वृत्तानुसार, रवींद्र जडेजाची गोलंदाजी व्हाइट बॉल क्रिकेटमध्ये मागच्या वर्षात हवी तशी नाही. चॅम्पियन्स ट्रॉफी 2025 मध्ये त्याला संधी दिली गेली. कारण तिथली खेळपट्टी त्याच्या गोलंदाजीला पूरक होती. दुसरीकडे, त्याच्या फलंदाजीतही आता पूर्वीसारखा दम राहिला नसल्याचं बोललं जात आहे. त्यामुळे त्याच्या जागी अक्षर पटेलची निवड केली गेली आहे. रिपोर्टनुसार, संघ व्यवस्थापन दक्षिण अफ्रिकेत प्लेइंग 11मध्ये एक मुख्य फिरकीपटू ठेवणार आहे. हर्ष दुबेला अक्षर पटेलाचा बॅकअप म्हणून तयार केलं जात आहे.
रवींद्र जडेजाचं करिअर संपलं का?
न्यूझीलंडविरुद्धच्या वनडे मालिकेत रवींद्र जडेजा शेवटचा वनडे सामना खेळला होता. हा सामना इंदुरमध्ये खेळला गेला होता. त्यात त्याने फलंदाजी करताना फक्त 12 धावा केल्या होत्या. तसेच तीन सामन्यांच्या वनडे मालिकेत फक्त 43 धावा करू शकला होता. जडेजाने 210 वनडे सामन्यात 232 विकेट घेतल्या आहेत. दुसरीकडे, अक्षर पटेल या फॉर्मेटमध्ये चांगली कामगिरी करत आहे. त्याने गोलंदाजीसह फलंदाजीतही कमाल केली आहे. त्याने 72 वनडे सामन्यात 79 विकेट घेतल्या आहेत. त्याचा इकोनॉमी रेट हा 4.5 प्रति षटक आहे. तर वनडेतील 50 डावात 24.72 च्या सरासरीने 915 धावा केल्या आहेत.
