पुणेकरांना दिलासा, वाहतूक कोंडी आता होणार कमी, असा आहे तीन मार्गाचा नवीन प्लॅन | मराठी बातम्या (Latest Marathi News)

पुणे–शिरूर उन्नत महामार्ग हा सहा पदरी असणार असून त्याची लांबी 53.4 किलोमीटर आहे. या प्रकल्पासाठी सुमारे 7 हजार 300 कोटी रुपयांचा खर्च होणार आहे. तसेच वाघोली येथे दुमजली उड्डाणपूलही बांधण्यात येणार आहे. हा महामार्ग सुरू झाल्यानंतर पुणे–नगर महामार्गावरील वाहतूक कोंडी कमी होण्यास मदत होईल. यामुळे अहिल्यानगर आणि छत्रपती संभाजीनगरकडे जाणारा प्रवास अधिक सोपा आणि जलद होणार आहे. तसेच या मार्गावरील प्रवासाचा वेळ सुमारे 2 तास 45 मिनिटांपर्यंत कमी होण्याची अपेक्षा आहे.

पुणे–सोलापूर राष्ट्रीय महामार्गावरील वाहतूक सुरळीत करण्यासाठी हडपसर–यवत उन्नत मार्ग उभारण्यात येणार आहे. हा मार्ग सुमारे 31.5 किलोमीटर लांबीचा असेल. या प्रकल्पासाठी अंदाजे 5 हजार कोटी रुपये खर्च अपेक्षित आहे. सध्या या मार्गावर मोठ्या प्रमाणात वाहनांची वर्दळ असल्याने अनेकदा वाहतूक कोंडी होते. उन्नत मार्ग तयार झाल्यानंतर ही कोंडी कमी होण्यास मदत होईल. हा प्रकल्प पुढील तीन ते चार वर्षांत पूर्ण करण्यात येणार आहे.

मुंबई–पुणे द्रुतगती महामार्गावरून थेट पुणे–नगर महामार्गावर जाण्यासाठी नवीन जोडमार्ग उभारण्यात येणार आहे. त्यामुळे शहरातील मुख्य रस्त्यांवर न येताही वाहनांना पुढील प्रवास करता येणार आहे. यामुळे पुण्यातील वाहतूक कोंडी कमी करण्यास मदत होईल.या मार्गाची एकूण लांबी 53.2 किलोमीटर असणार असून, त्यासाठी तब्बल 6 हजार कोटी रुपयांचा खर्च अपेक्षित आहे. प्रकल्प पूर्ण झाल्यानंतर वाहनचालकांचा वेळ वाचणार असून, प्रवास अधिक सोपा आणि सुरळीत होईल.