महेंद्रसिंह धोनी आयपीएल 2027 मध्ये खेळणार का? सीएसके व्यवस्थापनाने दिली अशी माहितीImage Credit source: IPL/BCCI
आयपीएल 2026 स्पर्धा जेतेपदासाठी आता दोन सामन्यांचा खेळ शिल्लक राहिला आहे. आतापर्यंत सात संघाचा स्पर्धेतील प्रवास संपला असून जेतेपदासाठी आरसीबी, गुजरात टायटन्स आणि राजस्थान रॉयल्स शर्यतीत आहे. यापैकी गुजरात टायटन्स आणि राजस्थान रॉयल्सपैकी कोण अंतिम फेरी गाठणार याचा फैसला 29 मे रोजी क्वॉलिफायर 2 फेरीत होणार आहे. असं असताना या स्पर्धेतून चेन्नई सुपर किंग्सचं आव्हान साखळी फेरीतच संपुष्टात आलं आहे. चेन्नई सुपर किंग्सने यंदाच्या पर्वात 14 पैकी 6 सामन्यात विजय मिळवला आणि 12 गुणांसह आठव्या स्थानी राहिला. या स्पर्धेतील 14 सामन्यात धोनी एकही सामना खेळला नाही. दुखापतीमुळे मैदानापासून दूर राहिला. चेपॉक मैदानावर शेवटचा सामना खेळेल अशा वावड्या उठल्या होत्या. मात्र त्या बातम्याही वावड्या ठरल्या. दुसरीकडे, याच मैदानात फोटो सेशन झाल्याने धोनी निवृत्ती घेणार असंही बोललं गेलं. पण धोनीने यावेळी अंदाज वर्तवणाऱ्यांना चकवा दिला. त्यामुळे धोनी पुढच्या पर्वात खेळणार का? असा प्रश्न आहे.
आयपीएल 2026 मध्ये चेन्नई येथे झालेल्या सीएसकेच्या अंतिम सामन्यानंतर धोनीने चाहत्यांना अभिवादन केले. त्यामुळे धोनी अचानक निवृत्ती जाहीर करू शकतो अशी भीती चाहत्यांना आहे. कारण त्याने यापूर्वी असं केलं आहे. महेंद्रसिंह धोनीच्या चाहत्यांना धोनीने सामना खेळून निवृत्त व्हावं अशी इच्छा व्यक्त केली आहे. त्यामुळे पुढच्या पर्वात धोनीने खेळावं अशी मागणी जोर धरत आहे. दुसरीकडे, महेंद्रसिंह धोनीनेही पुढच्या पर्वात खेळणार की नाही याबाबत स्पष्ट काही सांगितलेलं नाही. असं असताना चेन्नई सुपर किंग्सचे सीईओ काशी विश्वनाथन यांनी धोनीच्या आयपीएल 2027 मध्ये सहभागी आणि निवृत्तीबाबत माहिती दिली आहे.
क्रिकबझशी दिलेल्या मुलाखतीत सीएसकेचे सीईओ काशी विश्वनाथन म्हणाले की, धोनी पुढच्या पर्वात खेळू शकतो. काशी विश्वनाथन म्हणाले की, “मला विश्वास आहे की तो पुढच्या हंगामात परत येईल. आम्ही अद्याप त्याच्याशी याबद्दल बोललो नाही, पण आम्हाला आशा आहे की धोनी परत येईल.” धोनी आपला शेवटचा सामना चेन्नईमध्ये खेळेल आणि त्याने आपले वचन पाळावे अशी त्यांची इच्छा आहे. धोनीने सांगितलं की, “आम्हालाही आशा आहे की धोनी सीएसकेच्या चाहत्यांना दिलेले वचन पाळेल आणि आपला शेवटचा सामना चेन्नईमध्ये खेळेल.”
