बाळ होईना म्हणून दत्तक घेतलेला मुलगा; अनेक नवसांनंतर झाला सियाचा जन्म पण.., ‘त्या’ सवयीमुळे नातेवाईकही ठेवायचे अंतर | पुणे बातम्या (Pune News)

गोयल कुटुंबाशी दीर्घकाळापासून जोडल्या गेलेल्या सरस्वती गोयल यांनी सियाच्या कौटुंबिक पार्श्वभूमीबद्दल अत्यंत थक्क करणारी माहिती दिली. सियाच्या आई-वडिलांना लग्नानंतर अनेक वर्षे मूलबाळ होत नव्हते. आपल्याला कधी बाळ होणारच नाही, या भीतीने त्यांनी अखेर आपल्या भावाच्या मुलाला दत्तक घेतले होते. मात्र, त्यानंतर अनेक मंदिरांमध्ये देवाकडे साकडं घातल्यानंतर आणि नवस मागितल्यानंतर सियाचा जन्म झाला. त्यामुळे ती संपूर्ण कुटुंबाची अतिशय लाडकी होती.

सियाचे आई-वडील अत्यंत धार्मिक वृत्तीचे आहेत. ते समाजात नेहमीच विविध धार्मिक आणि सामाजिक कार्यक्रमांचे आयोजन करत असतात. त्यांच्या घरात नेहमी श्रीमद्भगवद्गीतेचे पठण आणि अनेक धार्मिक विधी सातत्याने होत असायचे. अत्यंत सुसंस्कारी वातावरणात वाढूनही सिया मात्र गुन्हेगारीच्या अंधाऱ्या दुनियेकडे आकर्षित झाली. तिने तिच्यावर झालेल्या धार्मिक संस्कारांना तिलांजली देत थेट होणाऱ्या पतीच्या हत्येचाच कट रचला.

समोर आलेल्या माहितीनुसार, सियाला नशेची अत्यंत भयंकर सवय जडली होती. ती नेहमी मित्र-मैत्रिणींच्या घोळक्यात आणि पार्ट्यांमध्ये बुडलेली असायची. तिच्या या नशेच्या सवयीमुळे तिचे स्वतःचे नातेवाईक आणि परिचयाचे लोक देखील घाबरायचे. सियाच्या संपर्कात येऊन आपली मुले बिघडू नयेत, म्हणून अनेक नातेवाईक आपल्या मुला-मुलींना सियाच्या मैत्रीपासून जाणीवपूर्वक लांब ठेवायचे.