नाशिकचा भोंदू बाबा अशोक खरात याचे कारनामे अख्ख्या महाराष्ट्राने पाहिले. महिलांना फसवून, त्यांच्या श्रद्धेचा गैरफायदा घेत अशोक कराडने अनेक महिलांचे कित्येक वर्ष लैंगिक शोषण केलं, तसेच त्यांची आर्थिक आणि मानसिक फसवणूक देखील केल्याते उघड झाले. तपासातून त्याचे नवनवे कारनामे, त्याने केलेली फसवणूक याचे तपशील बाहेर आल्यावर अख्खा महाराष्ट्र हादरला. त्यानंतर अशा अनेक भोंदू बाबांचे कारनामे आणि त्यांचे चाळे, त्यांची फसवणूक उघड झाल्याने मोठी खळबळ माजली.
अशीच एक धक्कादायक घटना आता सांगलीजवळ घडली आहे. ‘ तू मागच्या जन्मीची नागीण आहेस’ असे सांगून विट्यातील ‘कडेश्वर धाम’च्या तिघा भोंदूंबाबाकडून अल्पवयीन मुलीवर अत्याचार करण्यात आल्याचा धक्कादायक प्रकार उघडकीस आला आहे. याप्रकरणी पोलिसांनी तीनही भोंदू बाबांवर पोक्सो अंतर्गत गुन्हा दाखल केला असून या घटनेचा कसून तपास करण्यात येत आहे.
काय घडलं नेमकं ?
महापुरुषांचा संचार असल्याचं सांगत शरीरिक व आर्थिक फसवणूक करणाऱ्या सांगलीच्या विटा येथील तिघा भोंदूकडुन एका अल्पवयीन मुलीवर लैंगिक अत्याचार करण्यात आल्याची अत्यंत धक्कादायक, खळबळजनक घटना उघडकीस आली. या प्रकरणी तिघांवर विटा पोलीस ठाण्यामध्ये पोक्सो अंतर्गत गुन्हा दाखल करण्यात आला आहे. धक्कादायक म्हणजे पीडित मुलीला,तू मागच्या जन्मी नागिण होतीस, आणि संकेतबाबा नाग होता, त्यामुळे या जन्मी लग्न व्हावं म्हणून तुझा जन्म झाला असं त्यांनी त्या मुलीला सांगितलं. तिचा गैरफायदा घेत तिघांनी तिच्यावर अत्याचार तर केलाच पण त्यांची विकृती एवढ्यावरच थांबली नाही.
व्हिडीओही केला रेकॉर्ड
तीनही आरोपींनी या अत्याचाराचा व्हिडीओ देखील रेकॉर्ड केल्याचं पोलीस तपासात समोर आले आहे. एवढच नव्हे तर हा व्हिडीओ व्हायरल करू अशी धमकी त्या तिघांनी पीडित मुलीला दिली आणि वारंवार अत्यातर केले. तसेच पीडित मुलीच्या वडिलांकडून पूजा व हवन करण्यासाठी सुमारे साडेचार लाख रुपये घेऊन फसवणूक केल्याचाही प्रकार उघडकीस आला आहे.
या प्रकरणी अटकेत असणाऱ्या भोंदू महेश मोहन बाबर, संकेत संदीप निकमआणि सूरज उपाध्ये या तिघांविरुद्ध पोक्सो अंतर्गत आणि आर्थिक फसवणूक प्रकरणी गुन्हा दाखल करण्यात आला आहे. विटा पोलीसांकडून अधिक तपास करण्यात येत आहे.
