मासे खाणाऱ्यांची संख्या फार मोठी आहे. लहान मुलांपासून मोठ्यांपर्यंत सर्वांना मासे प्रचंड आवडतात. डॉक्टर देखील मासे खाण्याचा सल्ला देतात. कारण मासे आरोग्यासाठी अत्यंत लाभदायक आहेत. शरीराला आवश्यक प्रथिने आणि चांगले फॅटी ॲसिड पुरवणाऱ्या मुख्य अन्नपदार्थांपैकी एक म्हणून माशांची ओळख आहे. परंतु बाजारात मासे खरेदी करताना, त्यांची गुणवत्ता आणि ताजेपणा योग्यरित्या जाणून घेणं आवश्यक आहे. बरेच लोक केवळ बाह्य स्वरूप पाहूनच मासे खरेदी करत असल्यामुळे, कधीकधी शिळे किंवा निकृष्ट दर्जाचे मासे घरी आणले जातात. त्यामुळे, तज्ज्ञांच्या मते, काही सोप्या गोष्टींचे निरीक्षण करून चांगल्या प्रतीचे मासे निवडता येतात.
ताजे मासे ओळखण्यासाठी, सर्वप्रथम त्याचे डोळे पाहावेत. ज्या माशांचे डोळे चमकदार आणि थोडे पारदर्शक असतात, ते सहसा ताजे असतात. जर डोळे निस्तेज किंवा खोल गेलेले असतील, तर तो मासा बराच काळ बर्फात साठवून ठेवलेला असू शकतो. माशाच्या त्वचेवर देखील एक सामान्य चमक असली पाहिजे. जर त्वचा कोरडी किंवा रंगहीन असेल, तर अशा माशांची खरेदी न करणं उत्तम असतं.
माशाचे कल्ले हे त्याच्या ताजेपणाचे एक महत्त्वाचे वैशिष्ट्य मानले जातात. ताज्या माशांमध्ये कल्ले सहसा लाल किंवा गुलाबी रंगाचे असतात. मात्र, जुन्या माशांमध्ये ते तपकिरी रंगाचे किंवा निस्तेज दिसू शकतात. त्यामुळे, खरेदी करण्यापूर्वी त्या भागाची काळजीपूर्वक तपासणी केल्यास तुम्हाला योग्य निवड करण्यास मदत होईल.
मासे विकत घेताना, तुम्ही त्याच्या वासाकडे दुर्लक्ष कधीच करू नका. ताज्या माशांना फक्त समुद्राचा किंवा पाण्याचा नैसर्गिक वास येतो. ज्या माशांना तीव्र वास येतो, ते निकृष्ट दर्जाचे असण्याची शक्यता असते. जरी काही लोक वास लपवण्यासाठी ते बर्फाखाली ठेवून विकत असतील, अशा माशांची खरेदी करु नका.
मासे खाणे आरोग्यासाठी चांगले असले तरी, चांगल्या प्रतीचे मासे निवडणे त्याहूनही महत्त्वाचे आहे. बाजारात फिरल्यास आणि अधिक लक्ष दिल्यास तुम्हाला चांगल्या प्रतीचे आणि चविष्ट मासे खरेदी करता येतील. माशांचे स्वरूप, वास, कल्ल्यांचा रंग आणि शारीरिक स्थिती यांसारख्या वैशिष्ट्यांच्या आधारावर, विशेषतः आपल्या कुटुंबाच्या आरोग्याचा विचार करून मासे खरेदी केरा.
