आज शिवसेनेच्या वर्धापन दिनानिमित्त शिवसेना ठाकरे गटाचा मोळावा पार पडला, या मेळाव्यात बोलताना शिवसेना ठाकरे गटाचे प्रमुख उद्धव ठाकरे यांनी शिवसेना शिंदे गट, भाजप आणि बंडखोर खासदारांवर जोरदार हल्लाबोल केला आहे. मी तुम्हाला विचारतो. जसं तुम्ही मला जपलं, हा शिवसेनाप्रमुखांचा आदेश होता. मी कसा आहे हे तुम्हाला माहीत आहे. माझ्या माणसाने एक बोट दाखवलं तर मी क्षणभरही पदावर राहत नाही. म्हणून मी मुख्यमंत्री पद सोडलं. मला काही हवं असतं तर मी विधानसभेत बसलो असतो. ६० वर्ष पूर्ण झाले. मी १२ वर्षापासून नेतृत्व करतो. माझ्यावर जे आरोप झाले, ते खरे असतील तर मला सांगा मी आता पायउतार व्हायला तयार आहे.
तुमच्यापैकी एक शिवसैनिक येऊ द्या, तो पक्षप्रमुख होईल. ही सोन्यासारखी शिवसेना चोराच्या दरोडेखोराच्या हातात जाऊ देऊ नये. लाचार आणि गद्दार नको, लाचार गद्दार आणि भेसळयुक्त माणूस माझ्यावर आरोप करत असेल तर त्याला उत्तर तुम्ही द्यायचं आहे. मी पद सोडायला तयार आहे. मी डगमगलो नाही, मी खचलेलो नाही. अनेक संकट आली अनेक वादळं आली, मी पळणारा नाही. मी पहाडासारखा उभा राहीन, जबाबदारी स्वीकारेन. पण तुमच्या मनात जोपर्यंत विश्वास आहे तोपर्यंतच मी करेन. ज्या क्षणी तुम्हाला वाटेल त्या क्षणी पद सोडल्याशिवाय राहणार नाही, असं यावेळी उद्धव ठाकरे यांनी म्हटलं आहे.
एका बाजूला सुप्रीम कोर्ट आणि कायदा मंत्री बॅटमिंटन खेळत आहेत आणि आमचं शटल कॉक झालंय. आता हा विचार सर्वांनी केला पाहिजे. शिवसेना हवी की नको याचा विचार करा. मी जिल्हा परिषद निवडणुकीला मी नाही फिरलो. स्थानिक नेते उभे राहावेत म्हणून मी फिरलो नाही. तुम्ही जबाबदारीची धुरा घेणार आहात की नाही? तुम्ही आमदार आहात, खासदार आहात. करा नेतृत्व. लढवा निवडणुका, असंही यावेळी उद्धव ठाकरे यांनी म्हटलं आहे. त्यांनी बंडखोर खासदारांवर चांगलाच हल्लाबोल केला आहे.
