घरात घुसले, मोबाईल हिसकावला आणि…, महिला सरंपचासोबत घडला विचित्र प्रकार, बीडमध्ये खळबळ | बीड बातम्या (Beed News)

गेवराई तालुक्यातील नागझरी येथे ही धक्कादायक घटना घडली. सरपंच आश्विनी शिंदे यांनी दिलेल्या तक्रारीनुसार, गाव परिसरातील अवैध वाळू वाहतुकीबाबत यापूर्वीही काही व्यक्तींविरोधात कारवाईची प्रक्रिया सुरू होती. त्या प्रकरणातील गुन्हे मागे घेण्यासाठी सातत्याने दबाव टाकला जात असल्याचे त्यांनी म्हटले आहे. त्यांच्या पती नारायण शिंदे यांनाही विविध माध्यमांतून धमक्या दिल्या जात होत्या. नारायण शिंदे हे सामाजिक आणि राजकीय क्षेत्रात सक्रिय असून व्यवसायाने वकील आहेत.

मंगळवारी सायंकाळच्या सुमारास काही महिला सरपंचांच्या निवासस्थानी आल्या. त्यांनी घरात जबरदस्तीने प्रवेश करून कुटुंबीयांशी वाद घातल्याचे फिर्यादीत नमूद करण्यात आले आहे. या वेळी सरपंचांच्या पतीला गुन्हा मागे घेण्यास सांगण्यात आले. तसे न केल्यास खोट्या गुन्ह्यात अडकवण्याची धमकी देण्यात आल्याचा आरोप आहे. घरातील एका सदस्याने घडणाऱ्या प्रकाराचे मोबाईलवर चित्रीकरण करण्याचा प्रयत्न केला असता त्याच्याकडील मोबाईल हिसकावून घेण्यात आल्याचे सांगण्यात आले.

या गोंधळादरम्यान सरपंचांच्या गळ्यातील सुमारे दहा ग्रॅम वजनाचे सोन्याचे मंगळसूत्र ओढून घेतल्याचीही तक्रार करण्यात आली आहे. त्यामुळे घरातील वातावरण अधिक तणावपूर्ण बनले. घटनेमुळे परिसरात काही काळ खळबळ उडाली होती. कुटुंबीयांनी तत्काळ पोलिसांकडे धाव घेत संपूर्ण प्रकाराची माहिती दिली.