अभिनेत्री सोनाक्षी सिन्हा आणि झहीर इक्बाल यांच्या आंतरधर्मीय लग्नावरून अनेकांनी त्यांना ट्रोल करण्याचा प्रयत्न केला. मात्र हे दोघं एकमेकांच्या धर्माचा नेहमीच आदर करताना दिसतात. आता सोनाक्षीने झहीरसोबतच्या लग्नाच्या दिवसातील एका खास क्षणाची आठवण चाहत्यांना सांगितली आहे. यासोबतच तिने तिला मिळालेल्या अत्यंत खास भेटवस्तूचाही फोटो शेअर केला आहे. इन्स्टाग्रामवर तिने तिच्या घरातील पेंटिंगचे हे फोटो पोस्ट केले असून त्यात गायत्री मंत्र आणि कलमा हे दोन्ही एकत्र लिहिल्याचं तिने सांगितलं आहे. सोनाक्षीच्या लग्नातील खास क्षणसुद्धा असाच काहीसा होता. ज्यावेळी पंडित गायत्री मंत्रचा जप करत होते, त्याचवेळी अझानचाही आवाज तिच्या घरात घूमत होता.
हे फोटो शेअर करत सोनाक्षीने लिहिलं, ‘जेव्हा आमचं लग्न पार पडत होतं आणि पंडित गायत्री मंत्रचा जप करत होते, तेव्हा अझानचाही आवाज आमच्या घरापर्यंत पोहोचत होता. त्या दोन्ही प्रार्थनांच्या शक्तीने आमच्या घराला आज इतकं आनंदी बनवलं आहे. एके दिवशी जेव्हा आम्ही ऑस्ट्रेलियामध्ये सुट्ट्यांचा आनंद घेत होतो, तेव्हा शुभिका शर्माचा अचानक फोन आला. ती म्हणाली की तिला आमच्या लग्नासाठी आम्हाला एक पेंटिंग भेट द्यायची आहे. पण जेव्हा तिने आम्हाला काय द्यायचं आहे हे समजावून सांगितलं, तेव्हा असं वाटलं की जणू काही तिला ही कल्पना आमच्या मनातूनच सुचली आहे. त्या पेंटिंगमध्ये आमच्या दोघांचीही श्रद्धा आणि प्रेम यांचं सकारात्मकतेच्या सुसंवादात कसं रुपांतर झालं आहे, याचं प्रतिबिंब असल्याचं ती म्हणाली.’
सोनाक्षीने शेअर केलेला फोटो-
या पोस्टमध्ये सोनाक्षीने पुढे म्हटलंय, ‘मग तिने माझी ओळख कलाकाराशी करून दिली. अत्यंत प्रतिभावान कलाकार आदिला बेदी आमच्या घरी आला. त्याने आमचे विचार आणि भावना समजून घेतल्या आणि त्या कॅनव्हासवर सुंदरपणे उतरवल्या. तुम्ही याला एक दैवी चमत्कारच म्हणू शकता, कारण जेव्हा आम्ही लॉस एंजेलिसमध्ये होतो, तेव्हा त्याने माझ्याशी संपर्क साधला. आम्ही तिथे आहोत हे त्याला माहितही नव्हतं आणि त्याने मला सांगितलं की पेंटिंग तयार आहे. गायत्री मंत्र आणि कलमा यांचा संगम असलेली ही सुंदर कलाकृती माझ्यासोबत परत आली आहे. या पेंटिंगने आमच्या घरात आपलं स्थान मिळवलं आहे. मला खात्री आहे की यामुळे आम्हाला आणखी प्रेम, आनंद आणि शांती मिळेल. हे घर आता अधिक परिपूर्ण आणि पवित्र वाटत आहे.’
सोनाक्षी ही हिंदू कुटुंबातील असून झहीर हा मुस्लीम पार्श्वभूमीचा आहे. या दोघांनी 23 जून 2024 रोजी कुटुंबीय आणि जवळच्या मित्रमैत्रिणींच्या उपस्थितीत लग्न केलं. सोनाक्षीने शेअर केलेल्या या फोटोंवर नेटकऱ्यांनी विविध प्रतिक्रिया दिल्या आहेत. यामध्ये गायत्री मंत्र तर स्पष्ट दिसत आहे, पण कलमा कुठे लिहिला आहे, असा सवाल काहींनी केला आहे.
