<p><strong>सोलापूर :</strong> पंढरीची <a href="https://marathi.abplive.com/topic/pandharpur">वारी (Pandharpur)</a> आता पूर्णत्वाला आली असून महाराष्ट्राच्या कानाकोपऱ्यातून आलेल्या पालख्या आणि हजारो दिंड्या पंढरपूरच्या जवळ पोहोचल्या आहेत. व्हिआयपी दर्शन बंद केल्यानंतर, आता सर्वसामान्य भाविकांसाठी विठ्ठलाचे दरवाजे दर्शनासाठी खुले आहेत. पालकमंत्री जयकुमार गोरे यांनी व्हीआयपी दर्शन बंदीबाबत कठोर अंमलबजावणी सुरू ठेवल्याने सर्वसामान्य वारकऱ्यांच्या दर्शनाची वेळ निम्म्यानी कमी झाली आहे. 8 ते 10 तासांत सध्या रांगेतील शेवटच्या <a href="https://marathi.abplive.com/topic/warkari">वारकऱ्यास (warkari)</a> दर्शन मिळत आहे. मात्र, आज दर्शन रांगेची पाहणी करत असताना जिल्हाधिकारी कार्तिकेयन यांनी दर्शन रांगेतील एका वृद्ध दांपत्याला व्हीआयपी दर्शन देत भक्त पुंडलिकाची परंपरा चालवली. एका अर्थाने वृद्ध वारकरी दाम्पत्यासाठी <a href="https://marathi.abplive.com/topic/collector">जिल्हाधिकारी (Collector)</a> भक्त पुंडलिक ठरले.</p>
<p>आषाढी एकादशी अवघ्या चार दिवसांवर येऊन पोहोचली असून भाविकांचा उत्साह पाहायला मिळत आहे. तर, पंढरपूरमध्ये प्रशासनाची देखील लगबग सुरू झाली असून आज जिल्हाधिकाऱ्यांनी स्वत: मंदिरात जाऊन दर्शनरांगेची पाहणी केली. सध्या आषाढी यात्रेमुळे लाखो भाविक विठुरायाच्या दर्शनासाठी तासन्‌तास रांगेत उभे आहेत. मात्र, सात तासांहून अधिक काळ चालत आलेल्या 80 वर्षाच्या वृद्ध आजी-आजोबांची अवस्था पाहून <a title="सोलापूर" href="https://marathi.abplive.com/solapur" data-type="interlinkingkeywords">सोलापूर</a>चे जिल्हाधिकारी एस.कार्तिकीयेन त्यांच्यासाठी पुढे सरसावले. जिल्हाधिकाऱ्यांनी या ज्येष्ठ वारकऱ्यांना थेट विठ्ठल-रुक्मिणीचे दर्शन घडवून आमच्यासाठी हे वृद्ध वारकरी हेच खरे व्हीआयपी आहेत, असेही त्यांनी म्हटले. जिल्हाधिकाऱ्यांचा हा संवेदनशीलपणा सध्या मंदिर परिसरात चर्चेचा विषय बनला आहे. </p>
<p>यंदाची आषाढी यात्रा विक्रमी होणार याचे संकेत दिसत असून पाच दिवस आधीच दर्शनाची रांग मंदिरापासून 8 किलोमीटर लांब गेली आहे. दर्शनाच्या रांगेत अनेक वृद्ध वारकरी सात-सात तास चालत पुढे सरकत होते. वयोमान, थकवा आणि दमट वातावरणामुळे वृद्ध दांपत्याला त्रास होत असल्याचे जिल्हाधिकारी यांच्या निदर्शनास आले. यावेळी जिल्हाधिकाऱ्यांनी स्वतः पुढाकार घेत वृद्ध आजी-आजोबांची विचारपूस केली. त्यांना धीर दिला त्यांच्या भक्तीचा आदर करत त्यांना विशेष व्यवस्था करून थेट श्री विठ्ठल-रुक्मिणीचे दर्शन घडवले. जिल्हाधिकाऱ्यांच्या या संवेदनशील निर्णयामुळे ज्येष्ठ वारकऱ्यांच्या डोळ्यांत आनंदाश्रू तरळले. वृद्ध वारकऱ्यांची सेवा हीच खरी विठ्ठल सेवा आहे. त्यांच्या भक्तीचा सन्मान व्हावा म्हणून त्यांना सुलभ दर्शनाची व्यवस्था करण्यात आली आहे, अशी भावना जिल्हाधिकारी एस. कार्तिकीयेन यांनी यावेळी व्यक्त केली.</p>
<h2>हेही वाचा</h2>
<p class="article-pg-title"><a href="https://marathi.abplive.com/photo-gallery/news/politics-narendra-modi-residence-in-delhi-agitation-police-detain-rahul-gandhi-priyanka-gandhi-and-akhilesh-yadav-also-taken-into-custody-1432621">दिल्लीत नरेंद्र मोदींच्या घरासमोर राडा, पोलिसांनी राहुल गांधींना उचललं; प्रियंका गांधींसह माजी मुख्यमंत्रीही ताब्यात</a></p>
Source link
अमरावतीतून वारी, काठी टेकत आली 80 वर्षांची आजी; कलेक्टरांनी दिलं विठ्ठलाचं VIP दर्शन, पुंडलिकाची आठवण
