Pakistan Cricket Board : पाकिस्तान क्रिकेटमध्ये मोठी उलथापालथ होण्याची शक्यता आहे. इंग्लंड दौऱ्यातील खराब कामगिरीनंतर पाकिस्तान क्रिकेट बोर्डाने संघ आणि व्यवस्थापनात मोठे बदल करण्यास सुरुवात केली आहे. सात खेळाडूंना आधीच संघाबाहेरचा रस्ता दाखवल्यानंतर आता निवड समितीतील आणखी एका मोठ्या नावावर गंडांतर येण्याची शक्यता आहे. माजी कसोटीपटू आणि राष्ट्रीय निवड समितीतील सदस्य आकिब जावेद यांचीही निवड समितीतून हकालपट्टी होण्याची शक्यता असल्याची माहिती समोर आली आहे.
आकिब जावेद यांचीही निवड समितीतून हकालपट्टी?
पीसीबीच्या सूत्रांनी दिलेल्या माहितीनुसार, आकिब जावेद यांना राष्ट्रीय निवड समितीतील जबाबदारीतून मुक्त करून लाहोरमधील हाय परफॉर्मन्स सेंटरमध्ये विकास संचालक म्हणून काम करण्यावर लक्ष केंद्रित करण्यास सांगितले जाऊ शकते. एका सूत्राने दिलेल्या माहितीनुसार, आकिब जावेद यांच्या भूमिकेत बदल करण्याचा निर्णय पीसीबीकडून घेतला जाण्याची शक्यता आहे. त्यामुळे पाकिस्तानच्या निवड समितीत मोठे फेरबदल होण्याचे संकेत मिळत आहेत.
रिझवानसह 7 खेळाडूंना आधीच बाहेरचा रस्ता
इंग्लंड दौऱ्यातील घडामोडींमध्ये पाकिस्तानने मोहम्मद रिझवान, इमाम-उल-हक आणि सलमान अली आगा यांच्यासह सात खेळाडूंना मायदेशी परत पाठवले. या निर्णयानंतर पाकिस्तानच्या संघ व्यवस्थापन आणि निवड समितीच्या कार्यपद्धतीवर प्रश्न उपस्थित झाले. सूत्रांच्या दाव्यानुसार, रिझवान आणि इमाम यांना केवळ खराब फॉर्ममुळेच संघाबाहेर करण्यात आले नाही, तर ड्रेसिंग रूममधील त्यांच्या वर्तनाचाही विचार करण्यात आला. सलमान अली आगा यांच्यावरही कारवाई करण्यात आली. या निर्णयामुळे पाकिस्तान क्रिकेटमध्ये मोठ्या बदलांची प्रक्रिया सुरू असल्याची चर्चा रंगली.
माइक हेसन यांच्या एका निर्णयाने चार खेळाडू बदलले
पाकिस्तानच्या टेस्ट संघाचे अंतरिम मुख्य प्रशिक्षक माइक हेसन यांच्या शिफारशीनंतर आणखी चार खेळाडूंना संघातून परत पाठवण्यात आल्याचे सूत्रांनी सांगितले. हेसन यांना इंग्लंडविरुद्धच्या अखेरच्या कसोटी सामन्यासाठी पाकिस्तानच्या टेस्ट संघाची जबाबदारी देण्यात आली होती. त्यानंतर त्यांनी संघाचा समतोल साधण्यासाठी काही बदल करण्याचा निर्णय घेतला. हेसन यांनी बर्मिंगहॅममध्ये पत्रकार परिषदेत सांगितले की, रिझवान, इमाम आणि सलमान यांना संघातून वगळण्याचा निर्णय त्यांच्या जबाबदारी स्वीकारण्यापूर्वीच घेण्यात आला होता. त्यामुळे या तिघांना संघाबाहेर करण्याच्या निर्णयाशी आपला थेट संबंध नसल्याचे हेसन यांनी स्पष्ट केले.
मिस्बाह-उल-हक यांनीही पद सोडण्याची तयारी दर्शवली?
पाकिस्तान क्रिकेटमधील बदलांची व्याप्ती आता निवड समितीपर्यंत पोहोचण्याची शक्यता आहे. सूत्रांच्या दाव्यानुसार, पाकिस्तानचा माजी कर्णधार आणि निवड समितीतील सदस्य मिस्बाह-उल-हक यांनीही पद सोडण्याची इच्छा व्यक्त केली आहे. त्यामुळे इंग्लंड दौरा संपल्यानंतर पाकिस्तान क्रिकेट बोर्डाकडून नवीन निवड समितीची घोषणा होण्याची शक्यता व्यक्त केली जात आहे.
हे ही वाचा –
