ENG vs NZ: लॅथमनंतर डेवॉन कॉनवेचं शतक, 87व्यांदा झालं असं आणि तिसऱ्यांदा किवी जोडीची धमालImage Credit source: New Zealand cricket Twitter
इंग्लंड आणि न्यूझीलंड यांच्यातील कसोटी मालिकेत दोन सामन्यानंतर 1-1 अशी स्थिती आहे. त्यामुळे तिसरा कसोटी सामना निर्णायक ठरणार आहे. या सामन्यात विजयी संघ मालिका खिशात घालणार आहे. असं असताना न्यूझीलंडच्या बाजूने या सामन्याचा कौल लागला आणि प्रथम फलंदाजी स्वीकारली. हा निर्णय न्यूझीलंड संघाच्या पथ्यावर पडला असंच म्हणावं लागेल. कारण या सामन्याचा पहिला दिवस डेवॉन कॉनवे आणि कर्णधार टॉम लॅथम यांनी गाजवला. या जोडीने पहिल्या विकेटसाठी 300हून अधिक धावांची भागीदारी केली. या जोडीने 433 चेंडूत 317 धावा केल्या. या सामन्यात कर्णधार टॉम लॅथमने पहिलं शतक झळकावलं. त्यानंतर डेवॉन कॉनवेने शतकी खेळी केली. डेवॉन कॉनवेने मागच्या दोन सामन्यातील अपयश मागे सोडत आठवं शतक झळकावलं.
लॅथमनंतर कॉनवेने शतक ठोकलं
नॉटिंघमच्या ट्रेंट ब्रिज स्टेडियममध्ये गुरूवारी तिसरा आणि शेवटचा कसोटी सामना सुरू झाला. न्यूझीलंडचा कर्णधार टॉम लॅथमने नाणेफेक होताच फलंदाजी स्वीकारली. टॉम लॅथमने दुसऱ्या सेशनमध्ये 17वं शतक ठोकलं. त्यानंतर डेवॉन कॉनवेच्या कामगिरीवर लक्ष केंद्रीत होतं. कारण दुसऱ्या सेशनच्या शेवटी नाबाद 94 धावांवर होता. टी ब्रेकनंतर डेवॉन कॉनवे शतक ठोकणार का? याबाबत चर्चा होती. ब्रेकनंतर त्याची विकेट पडेल अशी शक्यता वर्तवली जात होती. तिसरा सेशन सुरू होताच काही मिनिटात कॉनवेने शतक ठोकलं. इंग्लंडविरुद्ध कॉनवेचं दुसरं आणि कसोटी क्रिकेटमधील मागच्या 10 महिन्यातील चौथं शतक आहे.
तिसऱ्यांदा या जोडीने केली कमाल
लॅथम आणि कॉनवे या दोघांसाठी ही शतकी खेळी खूपच महत्त्वाची होती. कारण कसोटी क्रिकेटमध्ये 87व्यांदा एका डावात सलामीच्या दोन्ही फलंदाजांनी शतक ठोकलं आहे. ही शतकी कामगिरी खास ठरली कार यापूर्वी 85व्या आणि 86व्या वेळी लॅथम आणि कॉनवे जोडीने ही कामगिरी केली होती. कॉनवे आणि लॅथमने डिसेंबर 2025 मध्ये वेस्ट इंडिजविरुद्ध एका टेस्ट सामन्यातील दोन डावात शतक ठोकलं होतं. कसोटी क्रिकेट इतिहासात हा एकमेव कसोटी सामना असा आहे की, एका सामन्यातील दोन डावात एकाच संघाच्या दोन सलामीवीरांनी शतक ठोकलं होतं.
