Dhamaal 4 Box Office Collection: अजय देवगणचा बहुप्रतीक्षित कॉमेडी चित्रपट ‘धमाल 4’ (Dhamaal 4) अखेर प्रदर्शित झाला असून, पहिल्याच दिवशी त्याने बॉक्स ऑफिसवर दमदार सुरुवात केली आहे. विशेष म्हणजे, फारसा गाजावाजा किंवा मोठे प्रमोशन नसतानाही चित्रपटाने पहिल्याच दिवशी उत्कृष्ट कमाई करत प्रेक्षकांचा मोठा प्रतिसाद मिळवला आहे. अक्षय कुमारच्या ‘वेलकम टू द जंगल’ आणि आलिया भट्टच्या ‘अल्फा’ सारखे चित्रपट आधीपासूनच थिएटरमध्ये असतानाही ‘धमाल 4’ने दमदार एन्ट्री करत बॉक्स ऑफिसवर स्वतःची छाप पाडली आहे. (Box Office Collection)
देशांतर्गत बॉक्स ऑफिसवर किती कमाई?
इंद्र कुमार दिग्दर्शित ‘धमाल 4’ शुक्रवारी चित्रपटगृहांत प्रदर्शित झाला. सुरुवातीला चित्रपटाभोवती फारसा गाजावाजा नसला तरी प्रेक्षकांनी त्याला चांगला प्रतिसाद दिला. Sacnilkच्या अहवालानुसार, चित्रपटाने पहिल्याच दिवशी भारतात 13.75 कोटी रुपयांची ओपनिंग केली आहे. भारतातच नव्हे तर परदेशातही ‘धमाल 4’ला चांगला प्रतिसाद मिळाला आहे. चित्रपटाने ओव्हरसीज मार्केटमध्ये पहिल्याच दिवशी 5 कोटी रुपयांची कमाई केली. भारतातील ग्रॉस कलेक्शन आणि परदेशातील कमाई मिळून चित्रपटाने जगभरात एकाच दिवसात 21.50 कोटी रुपयांचा व्यवसाय केला आहे. दुसऱ्या दिवशी 33 टक्के ऑक्युपन्सीसह चित्रपटाच्या कमाईत 60.7 टक्क्यांची वाढ नोंदवण्यात आली आहे. त्यामुळे दोन दिवसांत चित्रपटाची भारतातील एकूण नेट कमाई 36.50 कोटी रुपयांवर पोहोचली आहे.
‘वेलकम 3’ आणि ‘अल्फा’वर परिणाम
‘धमाल 4’च्या प्रदर्शनानंतर इतर चित्रपटांच्या कमाईवर परिणाम झाल्याचे दिसून आले. ‘वेलकम टू द जंगल’, जो गुरुवारी 2 कोटींपेक्षा अधिक कमाई करत होता, त्याची कमाई शुक्रवारी घसरून 1 कोटी रुपयांवर आली. तर आलिया भट्टच्या ‘अल्फा’ने प्रदर्शनाच्या आठव्या दिवशी 1.65 कोटी रुपयांची कमाई केली. कॉमेडीचा तडका, लोकप्रिय स्टारकास्ट आणि ‘धमाल’ फ्रँचायझीची लोकप्रियता यामुळे ‘धमाल 4’ने पहिल्याच दिवशी बॉक्स ऑफिसवर दमदार सुरुवात केली आहे.
दरम्यान, ‘धमाल 4’ने अजय देवगणच्या यावर्षी प्रदर्शित झालेल्या ‘दे दे प्यार दे 2’ला मागे टाकले आहे. या रोमँटिक कॉमेडी चित्रपटाने दुसऱ्या दिवशी 12.25 कोटी रुपयांची (नेट) कमाई केली होती आणि दोन दिवसांचे एकूण कलेक्शन 21 कोटी रुपये होते. याशिवाय ‘सन ऑफ सरदार 2’पेक्षाही ‘धमाल 4’ची कामगिरी चांगली ठरली आहे. ‘सन ऑफ सरदार 2’ने दुसऱ्या दिवशी 8.25 कोटी रुपयांची (नेट) कमाई केली होती, तर दोन दिवसांचे एकूण कलेक्शन 15.50 कोटी रुपये होते.
‘टोटल धमाल’चा विक्रम अजूनही दूर
‘धमाल 4’समोर सर्वात मोठे आव्हान म्हणजे 2019 मध्ये प्रदर्शित झालेल्या ‘टोटल धमाल’चा विक्रम. या चित्रपटाने दुसऱ्याच दिवशी 20.40 कोटी रुपयांची (नेट) कमाई केली होती आणि अखेरीस भारतात 155.67 कोटी रुपयांचे नेट कलेक्शन करत मोठे यश मिळवले होते.’धमाल 4’ने दुसऱ्या दिवशी कमाईत वाढ केली असली तरी ‘टोटल धमाल’च्या विक्रमापर्यंत पोहोचण्यासाठी अजून मोठा पल्ला गाठायचा आहे. हा चित्रपट 2019 मधील ‘टोटल धमाल’चा सिक्वेल आहे.चित्रपटात अजय देवगण, अरशद वारसी, रितेश देशमुख, जावेद जाफरी, रवी किशन, संजय मिश्रा, उपेंद्र लिमये, अंजली आनंद, संजीदा शेख, ईशा गुप्ता आणि विजय पाटकर यांसारखे अनेक कलाकार महत्त्वाच्या भूमिकेत आहेत. या चित्रपटाचे बजेट सुमारे 200 कोटी रुपये असल्याचे सांगितले जात आहे.
