ब्लूमबर्गच्या अहवालानुसार या दोन्ही फंडांनी AI क्षेत्रातील सध्याच्या तेजीबाबत गंभीर चिंता व्यक्त केली आहे. याशिवाय चीनमधील इतर काही हेज फंडांनीही AI क्षेत्रात गुंतवणूक करताना सावध भूमिका घेतली आहे. मात्र यावर्षी AI संबंधित अनेक कंपन्यांच्या शेअर्समध्ये मोठी वाढही झाली आहे.
वीलस्प्रिंग ॲसेट आणि शांघाय बानक्सिया इन्व्हेस्टमेंट मॅनेजमेंट सेंटर यांनी म्हटले आहे की, जागतिक AI शेअर्समधील सध्याची तेजी दीर्घकाळ टिकणारी वाटत नाही. वीलस्प्रिंग ॲसेटने या परिस्थितीला थेट ‘सुपर बबल’ असे संबोधले असून त्याचा कोसळण्याचा टप्पा आता जवळ आल्याचा दावा केला आहे. तर बान्झिया इन्व्हेस्टमेंटच्या मते, AI बबल फुटण्याचे संकेत आधीच दिसू लागले आहेत.
बान्झिया इन्व्हेस्टमेंटने आपल्या पत्रात AI कंपनी अँथ्रोपिक (Anthropic) चे उदाहरण दिले आहे. फंडाच्या मते, कंपनीची वार्षिक महसूल वाढ (Annualized Revenue Run Rate) बाजाराच्या अपेक्षेपेक्षा कमी राहू शकते. तसेच मोठ्या तंत्रज्ञान कंपन्या AI मॉडेल्स चालवण्यासाठी लागणाऱ्या वाढत्या ‘टोकन कॉस्ट’मुळे मागे हटू शकतात. याशिवाय Anthropic च्या प्रतिस्पर्धी कंपन्या त्याच्या लोकप्रियतेवर परिणाम करू शकतात, असेही फंडाने नमूद केले आहे.
अहवालानुसार मे महिन्यात चीनमधील किमान चार इतर हेज फंडांनीही AI क्षेत्राबाबत सावध भूमिका घेतली होती. CSC Financial च्या मासिक अहवालानुसार, चार फंडांनी AI क्षेत्राबाबत सकारात्मक भूमिका घेतली होती, तर सात फंडांनी AI क्षेत्रावर कोणतीही स्पष्ट भूमिका व्यक्त केली नव्हती.
सुमारे 1.4 अब्ज डॉलर्सची मालमत्ता व्यवस्थापित करणाऱ्या वीलस्प्रिंग ॲसेटने म्हटले आहे की, चीनमधील अनेक AI इन्फ्रास्ट्रक्चर कंपन्यांकडे दीर्घकालीन स्पर्धात्मक फायदा (Competitive Advantage) नाही. या कंपन्यांचे व्यवसाय मॉडेल सामान्य स्वरूपाचे असून वाढ कायम ठेवण्यासाठी त्यांना सातत्याने मोठा भांडवली खर्च (Capital Expenditure) करावा लागतो, असे फंडाने नमूद केले आहे.
फंडाने असेही सांगितले की, केवळ वाढत्या मागणीमुळे AI कंपन्यांचे मूल्यांकन (Valuation) आणि बाजारमूल्य (Market Capitalization) इतक्या वेगाने वाढेल, अशी अपेक्षा नव्हती.
वीलस्प्रिंग ॲसेटने 2015 मधील चीनच्या शेअर बाजारातील तेजीचा उल्लेख करत सध्याच्या परिस्थितीची तुलना त्या काळाशी केली आहे. त्या वेळी ‘Brainless Buying’ म्हणजे कोणताही सखोल अभ्यास न करता केवळ तेजीच्या अपेक्षेने शेअर्सची खरेदी केली जात होती. सध्या AI क्षेत्रातही तशीच परिस्थिती दिसत असल्याचे फंडाने म्हटले आहे.
वीलस्प्रिंग ॲसेटच्या मते, चीनच्या देशांतर्गत शेअर बाजारातील सर्वाधिक चर्चेत असलेल्या काही AI शेअर्समध्ये 80 टक्क्यांपेक्षा अधिक घसरण होण्याची शक्यता आहे. मात्र फंडाने कोणत्याही विशिष्ट कंपनीचे नाव जाहीर केलेले नाही.
अहवालानुसार वीलस्प्रिंगच्या Zhiyuan Fund आणि Banxia च्या Low Volatility Macro Fund यांना यावर्षीच्या सुरुवातीच्या काही महिन्यांत किरकोळ तोटा सहन करावा लागला आहे. मात्र दीर्घकालीन कालावधीत हे दोन्ही फंड अद्याप नफ्यात असल्याचे सांगण्यात आले आहे.
यावर्षी चीनचा CSI Artificial Intelligence Index 35 टक्क्यांहून अधिक वाढला आहे. त्याच्या तुलनेत प्रमुख बेंचमार्क निर्देशांकात सुमारे 5 टक्के वाढ झाली आहे. दरम्यान दक्षिण कोरियाचा Kospi Index जवळपास 100 टक्क्यांनी वाढला असून त्यामध्ये SK Hynix आणि Samsung Electronics यांच्या शेअर्समधील मोठ्या तेजीचा महत्त्वाचा वाटा असल्याचे अहवालात नमूद करण्यात आले आहे.
बान्झिया इन्व्हेस्टमेंटचे संस्थापक ली बेई यांनी स्पष्टपणे सांगितले की, AI क्षेत्रात गुंतवणूक करण्याची इच्छा असलेल्या गुंतवणूकदारांनी अत्यंत सावधगिरी बाळगली पाहिजे. त्यांच्या मते AI क्षेत्रात संधी नक्कीच आहेत; मात्र सध्याच्या वाढलेल्या मूल्यांकनाच्या पार्श्वभूमीवर कोणताही गुंतवणुकीचा निर्णय अत्यंत विचारपूर्वक घेणे आवश्यक आहे.
