देऊळ बंद 2, शाहरुख खानImage Credit source: Instagram
प्रवीण तरडे लिखित आणि दिग्दर्शित ‘देऊळ बंद 2’ हा चित्रपट बॉक्स ऑफिसवर दमदार कमाई करतोय. 21 मे रोजी थिएटरमध्ये प्रदर्शित झालेल्या या चित्रपटाला आता एक महिना पूर्ण झाला आहे. तरीसुद्धा या चित्रपटाची चांगली कमाई सुरूच आहे. अशातच एका मुलाखतीत प्रवीण तरडेंनी बॉलिवूडचा ‘किंग’ अर्थात अभिनेता शाहरुख खानचे आभार मानले. शाहरुखच्या ‘रेड चिलीज एंटरटेन्मेंट’ या निर्मिती कंपनीने ‘देऊळ बंद 2’ची मोठी मदत केल्याचं त्यांनी सांगितलं. चित्रपटाला मोठ्या पडद्यापर्यंत पोहोचण्यासाठी जो DCP म्हणजेच डिजिटल सिनेमा पॅकेजचा बिल येतो, तो शाहरुखने पूर्णपणे माफ केल्याचा खुलासा प्रवीण तरडेंनी केला होता. हा बिल जवळपास 42 लाख रुपयांचा होता. मात्र यावरून आता नेटकरी प्रवीण तरडेंनाच ट्रोल करू लागले आहेत.
‘देऊळ बंद 2’ या चित्रपटाचा बजेट जवळपास आठ ते दहा कोटी रुपये इतका आहे. तर बॉक्स ऑफिसवर या चित्रपटाने तब्बल 82 कोटी रुपयांचं ग्रॉस कलेक्शन केलं आहे. प्रवीण तरडेंनी शाहरुखचे आभार मानताच नेटकऱ्यांनी त्यावर विविध प्रतिक्रिया देण्यास सुरुवात केली. ‘देऊळ बंद 2’ हा चित्रपट इतका यशस्वी ठरत असताना ते शाहरुखचे का आभार मानत आहेत, असा सवाल नेटकऱ्यांनी केला. त्यावर आता खुद्द प्रवीण तरडेंनीच उत्तर दिलं आहे. सोशल मीडियावर एक व्हिडीओ शेअर करत त्यांनी टीकाकारांना सडेतोड उत्तर दिलं आहे.
प्रवीण तरडे यांचा व्हिडीओ
#DeoolBand2 director #PravinTarde recieces backlash for praising #ShahRukhKhan‘s good gesture.
CALLS OUT A NEGATIVE CAMPAIGN
He said I have been promoting film all this time, roaming all over, but people didn’t post about it, but the moment SRK’s name was taken, people started… pic.twitter.com/p8KMXjoBko
— $@M (@SAMTHEBESTEST_) June 20, 2026
या व्हिडीओमध्ये प्रवीण तरडे म्हणाले, “सगळं फिरलो की.. उन्हातान्हात.. 48 डिग्रीत.. तेव्हा तुम्ही कुणीही कुठल्या पोस्ट नाही टाकल्या हो, कुणी लिहिलं नाही कुठलं. माझ्या या मराठी फिल्म इंडस्ट्रीतल्या दिग्गजांनी पण. एक बॉलिवूड स्टारचं नाव काय घेतलं.. धडाधड तुमच्या लेखण्या चालू झाल्या. म्हणजे मराठी माणसाने पब्लिसिटीसाठी नेमकं करायचं काय? खेड्यापाड्यातून, उन्हातान्हात आपल्या प्रेक्षकांना भेटत फिरायचं की मस्त एसीमध्ये बसून एखाद्या बॉलिवूड स्टारचं नाव घ्यायचं? मग तुम्ही मोकळे.. मी तुमच्या पोस्ट वाचल्या. लक्षात ठेवा.. तुम्ही कितीही थांबवायचा प्रयत्न केला तरी ‘देऊळ बंद 2’ शंभर कोटीला जाणार आणि चालला आहे. तुमच्या टीकांनी फरक पडत नाही.”
यावेळी प्रवीण तरडेंनी विंदा करंदीकर यांच्या कवितेतील ओळींचा उल्लेख करत पुढे म्हणाले, “उंची न आपुली वाढते, फारशी वाटून हेवा.. श्रेय ज्याचे त्यास द्यावे; एवढे लक्षात ठेवा. मग तो पिट्या असू दे, सुन्या 32 असू दे किंवा शाहरुख असू दे. ज्याने आपली मदत केली, जाहीरपणे त्याचं कौतुक आणि कबुली देता आली पाहिजे.” त्यांच्या या व्हिडीओवर नेटकऱ्यांनी विविध प्रतिक्रिया दिल्या आहेत.
