भारतीय क्रिकेट संघ सध्या अफगाणिस्तानविरुद्ध तीन एकदिवसीय सामन्यांची मालिका खेळत आहे. ही मालिका भारताच्या 2027 च्या एकदिवसीय वर्ल्ड कप स्पर्धेच्या तयारीची सुरुवात मानली जात आहे. येथून पुढे प्रत्येक सामन्यावर बारकाईने लक्ष ठेवले जाईल आणि खेळाडूंच्या कामगिरीनुसार त्यांचे संघातील स्थान पक्के होईल. 2027 वर्ल्ड कपमध्ये रोहित शर्मा आणि विराट कोहली खेळणार की नाही याबद्दलही अजून शाश्वती नाही. आता यातच भारतीय संघाच्या सहाय्यक प्रशिक्षक रायन टेन डोशेट यांनी एका खेळाडूला वॉर्निंग दिली आहे. जर कामगिरी चांगली केली नाही तर सरळ संघातून वगळले जाईल असा इशारा दिला आहे.
कुलदीप यादवचा फॉर्म सध्या भारतीय संघासाठी चिंतेचा विषय आहे. या पार्श्वभूमीवर, भारताचे सहाय्यक प्रशिक्षक, रायन टेन डोशेट यांनी कुलदीपबाबत एक महत्त्वपूर्ण विधान केले आहे. स्टार फिरकीपटू कुलदीप यादवला जर संघात जागा मिळवायची असेल तर फॉर्मात येणे आवश्यक आहे.
आयपीएलमधील खराब कामगिरीमुळे कुलदीपला, आयर्लंड आणि इंग्लंड दौऱ्यासाठीच्या भारताच्या टी-20 संघात त्याला स्थान मिळाले नाही. अफगाणिस्तानविरुद्धच्या तिसऱ्या एकदिवसीय सामन्यापूर्वी, टेन डोशेट म्हणाले, “त्याने मागच्या सामन्यात चांगली गोलंदाजी केली. तो काही काळापासून सातत्याने खेळलेला नाही, अगदी कसोटी सामन्यांमध्येही नाही. त्याच्याबद्दल कोणतीही चिंता नाही पण त्याने पुनरागमन करावे.” धरमशाला येथील पहिला सामना चुकवल्यानंतर, लखनौ येथील दुसऱ्या सामन्यातही त्याला एकही बळी घेता आला नाही.
टेन डोशेट म्हणाले, “आम्हाला संघात नेहमीच एक मिस्ट्री स्पिनर हवा असतो. पण ज्या प्रकारे खेळ बदलत आहे आणि फलंदाज फिरकी गोलंदाजांविरुद्ध इतके चांगले खेळत आहेत, त्यामुळे फिरकी गोलंदाजांना वेळोवेळी नवनवीन प्रयोग करावे लागतील. कुलदीप आणि इतर फिरकी गोलंदाजांनाही. भारतीय संघाचे स्पिनर कोच साईराज बहुतुले यांना त्यांच्यावर काम करावे लागेल. संघात स्थान मिळवण्यासाठी प्रत्येकामध्ये स्पर्धा आहे. संघाची निवड नेहमी विशिष्ट भूमिका आणि संतुलन लक्षात घेऊन केली जाते.”
ते पुढे म्हणाले, “मला कुलदीपच्या प्रतिभेबद्दल शंका नाही, पण संघात स्थान मिळवण्यासाठी अनेक खेळाडू शर्यतीत आहेत. त्याला सातत्याने चांगली कामगिरी करण्यासाठी आपल्याला प्रोत्साहित करण्याची गरज आहे.”
