UP Crime News: पोटच्या मुलाने आपल्या मित्रासोबत मिळून आई-वडील आणि बहिणीची हत्या केल्याचा भयावह प्रकार उघ़डकीस आला आहे. त्या दोघांनी मिळून घरातून दीड कोटी रुपयांचे दागिने लुटले. त्यानंतर दागिन्यांच्या वाटणीवरून त्यांच्यात वाद झाला, ज्यातून मित्रानेच त्या तरुणाची हत्या केली. त्यामुळे प्रयागराजमधील एका करोडपती कुटुंबातील चार सदस्यांच्या हत्येचा खुलासा झाला आहे.
गुन्ह्यानंतर, आरोपींनी दुकानाला बाहेरून कुलूप लावले आणि दागिन्यांसह पसार झाले. पोलिसांनी चहाचे दुकान चालवणाऱ्या आरोपी मित्र सनी गुप्ताला ताब्यात घेतले आहे. त्याच्याकडून चोरीचे दागिनेही जप्त करण्यात आले आहेत. तपासात असे उघड झाले आहे की, 2022 मध्ये त्या व्यावसायिकाने आपल्या मुलाला घरातून बाहेर काढले होते, ज्यामुळे तो संतापला होता. त्यानंतर त्याने हा गुन्हा केला. आरोपी सनी गुप्ताने माध्यमांना सांगितले, “मी विचार केला, ‘जर तो आई-वडिलांसाठी काही करू शकला नाही, तर माझ्यासाठी त्यानं काय केले असते?’ आम्ही कोणताही गुन्हा केला नाही. त्याने मला चिथावले आणि बोलावले. त्याने त्याच्या आई-वडिलांची हत्या केली. आम्ही दोघे सोने-चांदी घेऊन खाली उतरलो.” त्याने मला वाटा देण्याचे वचन दिले होते, पण त्याने दिले नाही. म्हणूनच मी त्याला मारले.
मंगळवारी, व्यावसायिक वीरेंद्र कुमार वैश्य (70), त्यांची पत्नी अनिता (65) आणि मुलगी मीनाक्षी (45) यांचे मृतदेह त्यांच्या घरात आढळले. घराला बाहेरून कुलूप होते, तर मुलगा अभिषेक सापडत नव्हता. संशय अभिषेकवर गेला. तथापि, सुमारे दोन तासांनंतर, अभिषेकचा (40) मृतदेह घराखालील एका दुकानात आढळला. दुकानालाही बाहेरून कुलूप होते. संपूर्ण कुटुंबाची कोणीतरी हत्या केल्याचा पोलिसांचा संशय होता.
बंटी, बबली आणि सून यांची हत्या
तपासादरम्यान, पोलिसांना व्यावसायिक दांपत्याच्या मृतदेहांपासून एक मीटर अंतरावर एक कार्डबोर्ड बॉक्स पडलेला आढळला. त्यावर लाल पेनाने “बंटी, बबली आणि सून यांची हत्या” असे शब्द लिहिलेले होते. सूत्रांनुसार, मुलाने पोलिसांची दिशाभूल करण्यासाठी आणि नुकत्याच तुरुंगातून सुटलेल्या आपल्या धाकट्या भावाच्या पत्नीवर संशय घेण्यासाठी हे लिहिले होते. ही घटना दक्षिण मलाका भागातील ह्युएट रोड चौकात घडली.
मुलाने खून का केला?
वीरेंद्र कुमार वैश्य यांचा भेटवस्तूंचा व्यवसाय होता. ह्युएट रोड चौकात त्यांचे दोन मजली घर होते. हे घर 8 हजार चौरस फूट क्षेत्रफळाचे असून त्याची किंमत 10 ते 15 कोटी रुपये असल्याचा अंदाज आहे. खालच्या भागात 14 दुकाने असून त्यापैकी 13 भाड्याने दिलेली आहेत. वीरेंद्र आपल्या कुटुंबासह वरच्या भागात राहत होते. त्यांची मुलगी, मीनाक्षी, भेटवस्तू विकण्याचे एक दुकान चालवत होती. वीरेंद्र वैश्य हे देखील त्याच दुकानात काम करत असत. त्यांचा मोठा मुलगा, अभिषेक, कीटकनाशके आणि फरशी स्वच्छ करण्याच्या द्रावणांचा व्यापार करत असे. अभिषेक आणि मीनाक्षी यांचे लग्न झाले नव्हते. धाकटा मुलगा कौशांबी तुरुंगात असून त्याची पत्नी, रितू, जामिनावर बाहेर आहे.
मुलाचे वडिलांशी भांडण होते
पोलिसांच्या तपासात असे उघड झाले आहे की, मोठा मुलगा अभिषेकचेही वडिलांशी पटत नव्हते. शेजारी आणि नातेवाईकांच्या मते, अभिषेकच्या संगतीवरून कुटुंबात अनेकदा वाद होत असत. एकदा अभिषेकने कोणाकडून तरी अनेक लाख रुपये उसने घेतले होते. वेळेवर पैसे परत न केल्यामुळे, अभिषेकच्या कर्जदारांनी त्याला मारहाण करून घेऊन गेले. पैसे परत न केल्यास त्याच्या संपूर्ण कुटुंबाला ठार मारण्याची धमकी त्यांनी दिली. नंतर, त्याची बहीण मीनाक्षीने पैसे देऊन अभिषेकची सुटका केली. यावरून वीरेंद्रचे अभिषेकशी भांडण झाले.
हत्या करून मृतदेह ब्लँकेट आणि रजयांनी झाकले
पोलिसांच्या सूत्रांनुसार, मुलाने आणि त्याच्या मित्राने मिळून कुटुंबाच्या हत्येचा कट रचला. त्यांनी आधी वीरेंद्र वैश्य यांची, त्यानंतर त्यांच्या पत्नी आणि मुलीची हत्या केली. त्यानंतर त्यांनी घरातील सर्व दागिने चोरले. दुर्गंधी पसरू नये आणि गुन्हा उघडकीस येण्यास उशीर व्हावा म्हणून त्यांनी मृतदेह रजया आणि ब्लँकेटने झाकले. घटनेनंतर, जमिनीवरील रक्ताचे डाग स्वच्छ करण्याचा प्रयत्न करण्यात आला. प्रथम पाणी आणि फ्लोअर क्लिनरचा वापर करण्यात आला, आणि नंतर रक्ताचे डाग पूर्णपणे पुसण्यासाठी जमिनीवर तेल ओतण्यात आले. घटनेनंतर, ते दोघे अभिषेकच्या दुकानात गेले. तिथे दागिन्यांच्या वाटणीवरून त्यांच्यात वाद झाला. त्यानंतर मित्राने अभिषेकची हत्या केली.
इतर महत्वाच्या बातम्या
आणखी वाचा
