पुणे येथील पिंपरी-चिंचवड फुगेवाडी आणि हडपसर पोलिस ठाण्याच्या हद्दीत विषारी दारुमुळे १८ हून अधिक जणांचा मृ्त्यू झाला आहे. या प्रकरणात २२ हून अधिक अधिकारी आणि कर्मचारी निलंबित झाले आहेत. या प्रकरणाचा तपास सीआयडीकडे सोपवण्यात आला आहे. आज या प्रकरणातील आरोंपींना सीआयडीच्या पथकाने घटनास्थळी आणले तेव्हा संतप्त नागरिकांनी त्यांच्यावर हल्ला करण्याचा प्रयत्न केला. मात्र,पोलिसांनी वेळी घटना नियंत्रणात आणल्या पुढील गोंधळ टळला.
पुणे येथील फुगेवाडी विषारी दारुकांडात १८ हून अधिक लोकांचा मृ्त्यू झाला आहे. या विषारी दारु वितरण करणारा मुख्य आरोपी योगेश वानखेडे याच्यासह राधेश्याम प्रजापती, कर्नल मिरका सिंग आणि गुरु मंगल सिंग या चार आरोपींना पिंपरी न्यायालयाने ८ जूनपर्यंत पोलिस कोठडी सुनावली आहे. या आरोपींना तपासासाठी आज घटना स्थळी फुगेवाडीत आणण्यात आले होते. या वेळी आरोपींना पासून परिसरात मोठा तणाव निर्माण झाला.
फुगेवाडी विषारी दारूकांड प्रकरणातील आरोपींना तपासासाठी घटनास्थळी आणल्यानंतर फुगेवाडीतील स्थानिक आणि पीडीत मृतांचे नातेवाईक संतप्त झाले होते. सीआयडीच्या पथकाने पंचनामा आणि तपासाची प्रक्रिया पूर्ण करण्यासाठी त्यांना येथे गुन्ह्याचा सीन रिक्रिएट केला. यानंतर तपासाची प्रक्रिया पूर्ण झाल्यानंतर आरोपींना परत नेत असताना संतप्त नागरिकांचा उद्रेक पाहायला मिळाला.
सुरक्षा कवच निर्माण करत जमावाला रोखले
यावेळी काही नागरिकांनी आरोपींच्या दिशेने धाव घेण्याचा प्रयत्न केल्याने परिसरात एकच गोंधळ उडाला. एका जेष्ठ महिलेनेही आरोपींपर्यंत पोहोचण्याचा प्रयत्न केला. परिस्थिती बिघडताच सीआयडी पथकाने आणि पोलिसांनी तातडीने वेळीच हस्तक्षेप केला. पोलिसांच्या पथकाने लागलीच आरोपींभोवती सुरक्षा कवच निर्माण करत जमावाला रोखले. काही तरुणांनी दगड उचलून मारण्याचा देखील प्रयत्न केला. वाढता रोष लक्षात घेऊन आरोपींना तातडीने वाहनातून रवाना करण्यात आले. पोलिसांच्या सतर्कतेमुळे कोणताही अनुचित प्रकार घडला नाही. या घटनेचे व्हिडिओ सोशल मीडियावर व्हायरल होत आहेत. विषारी दारूकांडानंतर फुगेवाडीत संतापाची लाट कायम आहे.
