भारत आणि इंग्लंड यांच्यात एकदिवसीय मालिका सुरु आहे. या मालिकेतील आता एकच सामना शिल्लक आहे. दोन सामने रंगले जो एक भारतीय संघाने जिंकला आणि दुसरा सामना इंग्लंडने जिंकला. मालिका जिंकण्यासाठी दोन्ही संघाना शेवटचा सामना जिंकावा लागेल. शेवटचा सामना जिंकण्यासाठी दोन्ही संघामध्ये चुरशीची लढाई असणार आहे. आता या सामन्यापूर्वी एक मोठी अपडेट समोर आली आणि त्यामुळे चाहत्यांना धक्काच बसला. क्रिकेटप्रेमींसाठी याहून वाईट बातमी कोणती असणार आहे की त्यांचा लाडका खेळाडू रोहित शर्माची इंग्लंडविरुद्धची पुढील मॅच ही शेवटची असणार आहे. आता रोहितची ही मॅच शेवटची असणार याबाबत आणखी एक अपडेट समोर येत आहे.
भारतीय कर्णधार रोहित शर्माचे आई-वडील, गुरुनाथ शर्मा आणि पूर्णिमा शर्मा, 19 जुलै रोजी लॉर्ड्सवर भारत आणि इंग्लंड यांच्यातील तिसऱ्या आणि अंतिम एकदिवसीय सामन्यापूर्वी लंडनमध्ये दाखल झाले आहेत. सूत्रांनुसार, हा सामना रोहित शर्माच्या एकदिवसीय कारकिर्दीतील शेवटचा असू शकतो. निवड समितीने त्याच्या भविष्यातील योजनांबद्दल माहिती दिल्यानंतर, रोहितने स्वतः आपल्या आई-वडिलांना लॉर्ड्सवर उपस्थित राहण्यासाठी विशेष व्यवस्था केली, जेणेकरून ते त्याचा शेवटचा सामना पाहू शकतील. याबद्दल अधिकृत माहिती समोर आलेली नाही.
वृत्तांनुसार, मुख्य प्रशिक्षक गौतम गंभीर आणि निवड समितीने गेल्या आठवड्यात रोहित शर्माला त्याच्या भविष्यातील योजनांबद्दल माहिती दिली. निवड समिती आता 2027 च्या एकदिवसीय विश्वचषकाला डोळ्यासमोर ठेवून पुढे जात आहे आणि संघात तरुण खेळाडूंचा समावेश करण्याची योजना आखत आहे. असे मानले जाते की यशस्वी जैस्वालसारख्या तरुण फलंदाजांना भविष्यातील एकदिवसीय संघात मोठी आणि अधिक नियमित भूमिका दिली जाऊ शकते, ज्यामुळे रोहित शर्माला संधी गमवावी लागू शकते.
सध्याचा इंग्लंड दौरा रोहित शर्मासाठी फलंदाजीमध्ये चढ-उतारांचा काळ ठरला आहे. त्याने पहिल्या एकदिवसीय सामन्यात केवळ 11 धावा केल्या, तर कार्डिफमध्ये खेळल्या गेलेल्या दुसऱ्या सामन्यात तो 47 चेंडूंमध्ये फक्त 26 धावाच करू शकला. संपूर्ण मालिकेत रोहितने आपला नेहमीचा आक्रमक स्वभाव दाखवला नाही आणि इंग्लंडच्या शिस्तबद्ध गोलंदाजीसमोर सातत्याने धावा करण्यासाठी त्याला संघर्ष करावा लागला. दुसऱ्या एकदिवसीय सामन्यातील त्याच्या अपयशानंतर, रोहित शर्मा एकदिवसीय क्रिकेटमधूनही निवृत्त होणार असल्याची बातमी समोर आली.
