IND vs ENG, 2nd ODI: विराट कोहलीने पाचव्या चेंडूवर चौकार मारत रचला विक्रम, काय केलं ते वाचाImage Credit source: BCCI Twitter
भारत इंग्लंड दुसऱ्या वनडे सामन्यात विराट कोहलीच्या कामगिरीकडे क्रीडाप्रेमींचं लक्ष लागून होतं. पहिल्या सामन्यात काही खास करू शकला नव्हता. तसेच 12 वर्षांपूर्वी कार्डिफच्या सोफिया गार्डन्स स्टेडियममध्ये उतरला होता. तेव्हा त्याला खातंही खोलता आलं नव्हतं. पण यावेळी विराट कोहलीने सावध फलंदाजीचा पवित्रा घेतला. मैदानात उतरल्यानंतर पहिले चार चेंडू त्याने निर्धाव घालवले आणि पाचव्या चेंडूवर चौकार मारत खातं खोललं. त्यामुळे 12 वर्षापूर्वीचा डाग पुसून काढला आहे. तसेच पहिल्याच चौकारावर एक मोठा विक्रम नावावर केला आहे. या चौकारासह विराट कोहलीने इंग्लंडमध्ये सर्वाधिक धावा करणारा भारतीय फलंदाज ठरला आहे. खरं तर त्याच्याकडे पहिल्याच सामन्यात ही कामगिरी करण्याची संधी होती. पण त्याला फक्त 5 धावा करता आल्या होत्या. मात्र या सामन्यात त्याने चौकार मारून हा विक्रम आपल्या नावावर केला आहे.
विराट कोहलीने माजी कर्णधार राहुल द्रविडचा विक्रम मोडीत काढला आहे. कारण इंग्लंडमध्ये सर्वाधिक धावा करण्याचा विक्रम त्याच्या नावावर होता. आता हा विक्रम विराट कोहलीच्या नावावर झाला आहे. राहुल द्रविडने इंग्लंडमध्ये तिन्ही फॉर्मेटमध्ये एकूण 56 डावात फलंदाजी केली आणि 2645 धावा केल्या. यात त्याने 8 शतकं ठोकली होती. तसेच त्याची सरासरीने 55 ची होती. आता विराट कोहलीने 75 डाव खेळले असून 40हून अधिकच्या सरासरीने 2645च्या पार धावा केल्या आहेत. पण विराट कोहलीने इंग्लंडमध्ये फक्त तीन शतकं ठोकली आहे. या यादीत मास्टर ब्लास्टर सचिन तेंडुलकर तिसऱ्या स्थानावर आहे. त्याने 56 डावात 2626 धावा केल्या आहेत.
विराट कोहलीचं शतक!
भारत इंग्लंड सामन्याच्या नाणेफेकीनंतर विराट कोहलीचं नाव प्लेइंग 11 मध्ये झळकलं आणि त्याच्या नावावर एक शतक झळकावलं गेलं. हे धावांचं शतक नाही, तर सामन्यांचं विशेष शतक आहे. विराट कोहली ने SENA देशात (दक्षिण अफ्रिका, इंग्लंड, न्यूझीलंड आणि ऑस्ट्रेलिया) 100 वनडे सामने खेळण्याचा मान मिळवला आहे. इंग्लंडमध्ये विराट कोहलीचा हा 35वा वनडे सामना आहे. आता या सामन्यात धावांचं शतक ठोकतो की नाही? याकडे क्रीडाप्रेमींचं लक्ष लागून आहे.
