बीडच्या केज येथील विलास घुले हत्या प्रकरणात धक्कादायक खुलासे होत आहेत. उमेश माने याला मारहाण होत असताना वाचवण्यासाठी गेलेल्या विलास घुले याची हत्या करण्यात आली. या प्रकरणात थेट बीडचे खासदार बजरंग सोनवणे यांच्या मुलाचे नाव आल्याने खळबळ उडाली. ज्यावेळी विलास घुले याला मारहाण होत होती, त्यावेळी मारेकरी हे साैरभ बजरंग सोनवणे याचे नाव घेत होते. मुख्य आरोपीला या प्रकरणात अटक करा, या मागणीसाठी केज शहरात मोठा मोर्चाही निघाला. विलास घुले याच्या कुटुंबियांनी गंभीर आरोप केले. सातत्याने घुले कुटुंबियांवर बजरंग सोनवणे यांचा मुलगा साैरभ सोनवणे याच्यावर आरोप केले जात आहेत. खऱ्या सूत्रधाराला वाचवण्याचा प्रयत्न केला जात असल्याचा आरोप आहे.
त्यामध्येच या प्रकरणात वेगळे वळण आले असून विलास घुले ज्या उमेश माने याला वाचवण्यासाठी गेला होता, त्याच्यावरच आता गुन्हा दाखल करण्यात आला. हे प्रकरण वेगळ्या दिशेला घेऊन जाण्यासाठी मुद्द्याम खोटे आरोप केले जात असल्याचे सांगितले जातंय. एका महिलेने विलास घुले प्रकपणात उमेश माने याच्यावर गंभीर आरोप केली होती. अखेर या प्रकरणात गुन्हा दाखल झाला.
याबाबत अधिक माहिती अशी की, उमेश माने हा महिलेवर जबरदस्तीने अत्याचार करत होता. तिचे काही आक्षेपार्ह व्हिडीओही त्याने तयार केली होती. तेच व्हिडीओ सोशल मीडियावर टाकण्याची धमकी दिली जात होती. त्यानंतर पिडितेने हा प्रकार आपल्या कुटुंबियांना सांगितला. कुटुंबिय तक्रार देण्यासाठी पोलिस स्टेशनमध्ये निघाले असता उमेश माने याने जीवे मारण्याची धमकी दिली.
भीतीपोटी त्यांनी पोलिसात तक्रार दिली नाही. शेतातील घर सोडून ते गावी राहण्यास आले. गावात गेल्यावरही पिडितेचा छळ थांबला नाही. उमेश माने आणि विलास घुले सतत तिच्या घराभोवती चक्कर मारायचे. तुला आणि तुझ्या पतीला जीवे मारू असेल धमकी द्यायचे. 20 जूनच्या रात्रीही तेच घडले. तू बाहेर ये तुला खल्लास करतो म्हणून त्यांनी धमकी दिली. त्यानंतर पीडितेचे वडील, पती आणि इतर काही नातेवाईक यांना समजवण्यासाठी एका हॉटेलमध्ये गेले.
तिथे वाद वाढला आणि विलास आणि उमेश यांनी काचेच्या बाटल्या आणि विटा फेकल्या. बेदम मारहाण सुरू केली. यावेळी माझ्या वडिलांनी स्वत:च्या बचावासाठी हात उचलला असता विलास घुले याचा झटपटीत मृत्यू झाला, असा दावा पीडितेने केला. यानंतर उमेश माने याच्यावर गुन्हा दाखल करण्यात आला. या प्रकरणाला आता वेगळेच वळण लागल्याचे बघायला मिळतंय.
