Iran War Live Update: अमेरिकेने आज (8 जुलै) पहाटे शस्त्रसंधीच्या काळात इराणवर हवाई हल्ला केला. यूएस सेंट्रल कमांड (सेंटकॉम) नुसार, अचूक शस्त्रास्त्रांनी 80 हून अधिक लष्करी ठिकाणांना लक्ष्य करण्यात आले. होर्मुझच्या सामुद्रधुनीतून जाणाऱ्या तीन जहाजांवरील हल्ल्यांना प्रत्युत्तर म्हणून ही कारवाई करण्यात आल्याचे अमेरिकेचे म्हणणे आहे. वॉशिंग्टनने या हल्ल्यांसाठी इराणला जबाबदार धरले आहे. या हवाई हल्ल्यांमध्ये हवाई संरक्षण प्रणाली, कमांड आणि कंट्रोल सेंटर्स, किनारी रडार, जमिनीवरून हवेत मारा करणारी क्षेपणास्त्रे, जहाजविरोधी क्षेपणास्त्र प्रणाली, ड्रोन प्रक्षेपण स्थळे आणि आयआरजीसीच्या 60 हून अधिक लष्करी बोटींना लक्ष्य करण्यात आले. इराणी माध्यमांनुसार, सिरिक, केशम बेट आणि बंदर अब्बास येथे अनेक स्फोट झाले आणि काही भागांमध्ये आग लागली.
खामेनी यांची अंत्ययात्रा नजफमध्ये
प्रत्युत्तर म्हणून, इराणी लष्कराने बहरीन आणि कुवेत येथील अमेरिकन लष्करी तळांवरील 85 हून अधिक लक्ष्यांवर हल्ला केल्याचा दावा केला आहे. दुसरीकडे, सर्वोच्च नेते अयातुल्ला खामेनी यांची अंत्ययात्रा नजफमध्ये सुरू आहे. अंत्ययात्रेच्या मार्गावर मोठ्या संख्येने भाविक उपस्थित आहेत खामेनी यांचे पार्थिव मंगळवारी रात्री इराकच्या नजफमध्ये दाखल झाले. इराणमध्ये अनेक दिवस चाललेल्या अंत्ययात्रा आणि धार्मिक विधींनंतर, ही शवपेटी एका विशेष विमानाने नजफमध्ये आणण्यात आली.
बहरीनमध्ये तिसऱ्यांदा हवाई हल्ल्याचे सायरन वाजले
बुधवारी बहरीनमध्ये तिसऱ्यांदा हवाई हल्ल्याचे सायरन वाजले. बहरीनच्या गृह मंत्रालयाने याला दुजोरा दिला आणि लोकांना तात्काळ जवळच्या सुरक्षित ठिकाणी स्थलांतरित होण्याचे व सतर्क राहण्याचे आवाहन केले.
गेल्या 24 तासांतील 4 प्रमुख घडामोडी
- खामेनी यांच्या अंत्यविधीच्या वेळी, इराणने होर्मुझमध्ये ३ टँकर्सना लक्ष्य केले, त्यापैकी एक कतारचा होता. इराणने इशारा दिला आहे की, जर निर्धारित मार्गाचे पालन केले नाही, तर सुरक्षा व्यवस्था अनियंत्रित होईल.
- कतारने होर्मुझमध्ये आपल्या जहाजावरील हल्ल्याचा निषेध केला आणि इराणला पूर्णपणे कायदेशीररित्या जबाबदार धरले. इराणी हल्ल्यांमुळे आंतरराष्ट्रीय सागरी सुरक्षेला धोका निर्माण होतो, असेही कतारने म्हटले आहे.
- इराणचे परराष्ट्र मंत्री अब्बास अराघची म्हणाले की, धमक्यांच्या वातावरणात कोणताही करार होणार नाही. सर्वप्रथम, अमेरिकेने आपल्या जुन्या करारांचा आदर केला पाहिजे.
- तेहरानमधील अंत्ययात्रेनंतर सलग दुसऱ्या दिवशी, कोममध्ये खामेनींच्या अंत्यविधीसाठी लाखो लोक जमले होते. अनेक लोकांनी सूडाचे प्रतीक म्हणून शवपेटीवर लाल कापडही ठेवले
इतर महत्वाच्या बातम्या
