गेल्या काही काळापासून राज्याच्या राजकारणात घडामोडींना वेग आला आहे. काही दिवसांपूर्वी शिवसेना उद्धव बाळासाहेब ठाकरे पक्षाच्या 6 खासदारांनी उपमुख्यमंत्री एकनाथ शिंदे यांच्या शिवसेनेत प्रवेश केला होता. अशातच काल एकनाथ शिंदे आणि या सर्व खासदारांनी केंद्रीय गृहमंत्री अमित शाह यांची भेट घेतली. यावेळी विविध मुद्यांवर चर्चा झाल्याचे समोर आले आहे. ठाकरेंचे खासदार फुटल्यानंतर शरद पवार यांच्या पश्राचेही खासदार फुटणार असल्याची चर्चा रंगली होती. आज झालेल्या पत्रकार परिषदेत एकनाथ शिंदे यांना याबाबत प्रश्न विचारण्यात आला होता. यावर बोलताना एकनाथ शिंदे यांनी नेमकं काय म्हटलं ते सविस्तर जाणून घेऊयात.
शरद पवारांचे एनडीएमध्ये स्वागत करणार?
राज्याच्या राजकारणात सध्या शरद पवारांची राष्ट्रवादी NDA मध्ये सहभागी होणार असल्याची चर्चा रंगली आहे. त्यामुळे शरद पवार यांच्या पक्षाचे एनडीएमध्ये स्वागत कराल का? असा प्रश्न एकनाथ शिंदे यांना विचारण्यात आला होता. यावर बोलताना शिंदे यांनी म्हटले की, NDA चा निर्णय घेणारे अमित शाह आणि पंतप्रधान मोदी आहेत. त्यामुळे एनडीएमध्ये कोणाला प्रवेश द्यायचा याचा निर्णय ते घेतील.
पवारांचे खासदार शिवसेनेत?
पुढे शरद पवार यांच्या पक्षातील खासदार शिवसेनेत येण्याच्या चर्चेवर बोलताना एकनाथ शिंदे म्हणाले की, शरद पवार यांच्या कोणत्याही खासदारांनी आमच्याशी संपर्क साधलेला नाही, तसेच मीही कोणाशी संपर्क साधलेला नाही. एकनाथ शिंदे यांच्या या विधानामुळे सध्या तरी शरद पवार यांच्या पक्षाचे खासदार पक्षांतराच्या मनस्थितीत नसल्याचे समोर आले आहे.
शरद पवारांसोबतच्या भेटीवर भाष्य
काही दिवसांपूर्वी एकनाथ शिंदे आणि शरद पवार यांची मंत्रालयात भेट झाली होती. याबाबत प्रश्न विचारला असता एकनाथ शिंदे यांनी सांगितले की, त्यांना त्यांच्या आमदारांशी चर्चा करायची होती, हे मला समजले आणि मी गेलो आणि भेटलो. ती आपली संस्कृती आहे, काही लोकांना विकृती आहे. दालन काय आमच्या नावावर आहे का? ज्या शरद पवारांचे खाता आणी त्यांनाच बोलता. त्यांच्या पायाखालची वाळू सरकलेली आहे. एकमेकांना भेटण्याची महाराष्ट्राची संस्कृती आहे, आम्ही संस्कृती जपतो पण काही लोकांना विकृती झाली आहे.
