Ashish Jayaswal : महायुतीमधील तिन्ही घटकपक्ष एकदिलाने काम करत आहेत, असे वरिष्ठ नेतृत्त्वाकडून नेहमी सांगितले जाते. परंतु स्थानिक पातळीवर तिन्ही पक्षाचे नेते, आमदार वेगवेगळ्या कारणामुळे नाराजी व्यक्त करताना पाहायला मिळते. अनेकदा महायुतीमधील घटकपक्षतील नेत्यांनी एकमेकांवर कठोर शब्दांत टीका केल्याचेही पाहायला मिळाले. दरम्यान, आता महायुतीमधील धुसफूस आता पुन्हा एकदा समोर आली आहे. जालना जिल्ह्यात निधीवाटपावरून शिंदे यांच्या शिवसेनेचे नेते तथा मंत्री आशिच जयस्वाल यांनी निधी वाटपावरून जाहीर नाराजी व्यक्त केली आहे. तसेच याबाबत जालन्याच्या पालकमंत्र्यांना मी पत्र लिहिलं आहे, असेही त्यांनी सांगितले.
जालन्याच्या पालकमंत्र्यांना आपण पत्र लिहिलं असून..
जालन्यात आज शिंदेंच्या शिवसेनेचे नेते मंत्री आशिष जयस्वाल आणि आमदार अर्जुन खोतकर यांच्या प्रमुख उपस्थितीमध्ये पदाधिकारी आणि कार्यकर्त्यांचा संवाद मेळावा पार पडला. कार्यकर्त्यांनी निधी वाटपाबाबत केलेल्या तक्रारीनंतर स्वतः मंत्री आशिष जयस्वाल यांनी या संदर्भात खंत व्यक्त केली. जालन्यात शिवसैनिकांच्या बाबतीत निधीमध्ये असमतोल आणि शिवसैनिकांवर अन्याय होत असल्याचं मंत्री आशिष जयस्वाल यांनी म्हटलंय. जालन्याच्या पालकमंत्र्यांना आपण पत्र लिहिलं असून आचारसंहिता संपल्यानंतर बैठक लावून महायुतीच्या समन्वय समितीमध्ये निधी वाटपाबाबत जे सूत्र ठरलं तेच स्थान आपलं राहणार असून तो बॅकलॉग भरल्याशिवाय स्वस्थ बसायचं नाही अशी भूमिका मंत्री आशिष जयस्वाल यांनी घेतली.
शिवसेनेच्या समर्थनशिवाय राज्यात एकही आमदार…
दरम्यान 2024 ला सरकार निवडून आल्यापासून आजपर्यंत जितका निधी वाटप करण्यात आला त्याची यादी काढा आणि निधी वाटपामध्ये आपल्यावर कशा प्रकारचा अन्याय झाला याची तंतोतंत आकडेवारी काढा, अशा देखील सूचना मंत्री आशिष जयस्वाल यांनी शिवसैनिकांना दिल्या. शिवसैनिकांच्या समर्थनाशिवाय महाराष्ट्राच्या विधानसभेत एकही आमदार निवडून येऊ शकत नाही, अशी ताकद निर्माण करा. तोपर्यंत तुम्हाला कोणीही किंमत देणार नाही असा सल्लाही मंत्री आशिष जयस्वाल यांनी कार्यकर्त्यांना दिला. आता जयस्वाल यांनी खंत व्यक्त केल्यानंतर महायुतीमध्ये नेमका काय निर्णय होणार, याकडेही सर्वांचे लक्ष लागले आहे.
