बापाची सावली व्हायचं होतं, पण नियतीने डाव साधला! डोळ्यादेखत मुलानं तडफडून सोडला जीव | महाराष्ट्र बातम्या

बापाला वाटायचं, पोरगा मोठा होऊन इंजिनिअर होईल. शिकून सवरून घराची गरिबी दूर करेल. पोरगाही तितकाच गुणी. कोल्हापूरला इंजिनिअरिंगचं शिक्षण घेत होता, पण सुट्टीत गावी आला की बापाच्या खांद्याला खांदा लावून शेतात राबायचा. मात्र, नियतीला हे सुख मान्य नसावं असा भयंकर प्रकार घडला. सोमवारी दुपारी शेतात बापाला मदत करत असतानाच आकाशातून थेट काळ कोसळला.

अभिषेक हा अत्यंत होतकरू तरुण होता. कोल्हापूरमध्ये इंजिनियरींग महाविद्यालयात तो शिक्षण घेत होता.त्याला सुट्ट्या लागल्यामुळे तो आपल्या घेडेगावी घरी आला होता. सोमवारी दुपारी रूपचंद दरेकर हे शेतात काम करत होते.

हात पाय थकलेल्या बापाला कष्ट करताना पाहून अभिषेकला राहावं नाही. तोही मदतीसाठी शेतात गेला. बाप-लेक हसतखेळत काम करत होते. पण अचानक दुपारी ४ वाजेच्या सुमारास हवामान बदलले. काळेभोर ढग दाटून आले, सोसाट्याचा वारा सुटला आणि विजांचा प्रचंड कडकडाट सुरू झाला. काही समजण्याच्या आतच एक मोठी वीज थेट अभिषेकच्या अंगावर कोसळली.

कुटुंबाला गरिबीतून बाहेर काढण्याचे स्वप्न उराशी बाळगून कोल्हापुरात शिक्षण घेणाऱ्या अभिषेकवर काळानं घाला घातला. असं काही होईल याचा विचारही स्वप्नातही विचार केला नव्हता. जो मुलगा उद्या कुटुंबाचा भक्कम आधार बनणार होता, त्याचीच अंत्ययात्रा काढण्याची वेळ या आई-वडिलांवर आली. अभिषेकच्या जाण्याने दरेकर कुटुंबावर दु:खाचा डोंगर कोसळला आहे.