थलापती विजयला चढला ‘पुष्पा’ फीव्हर! भर विधानसभेत केली ‘ती’ ॲक्शन, VIDEO पाहून फॅन्स झाले वेडे | ताज्या मनोरंजन बातम्या

नुकताच तमिळनाडू विधानसभेतील विजय यांचा एक व्हिडिओ सोशल मीडियावर तुफान व्हायरल झाला असून, चाहत्यांनी या व्हिडिओला थलापथीच्या वाढदिवसाची स्पेशल ट्रीट म्हणून घोषित केले आहे. विरोधकांनी सभागृहात कितीही गदारोळ केला, तरी विजय यांचा किलर अंदाज तसूभरही कमी झाला नाही, हेच या व्हिडिओतून समोर आले आहे.

विधानसभेतही विजय यांचा तोरा कायम

विधानसभेच्या चालू अधिवेशनात मुख्यमंत्री विजय यांचे भाषण सुरू असतानाच, विरोधी पक्ष असलेल्या डीएमकेच्या आमदारांनी गदारोळ करत सभागृहातून थेट वॉकआऊट केले. मात्र, समोरून विरोधक उठून जात असतानाही विजय यांनी त्यांच्याकडे पूर्णपणे दुर्लक्ष केले आणि स्वतःवर कोणताही दबाव येऊ दिला नाही.

भाषण संपवताना त्यांनी विधानसभा अध्यक्ष जे.सी.डी. प्रभाकर यांच्याकडे एक अजब परवानगी मागितली. विजय म्हणाले, “काही वर्षांपूर्वी माजी मुख्यमंत्री एम.के. स्टालिन यांनी ज्याप्रमाणे एका फिल्मी अंदाजात आपले भाषण संपवले होते, अगदी त्याच स्टाईलमध्ये मलाही आजच्या भाषणाचा शेवट करायचा आहे.”

भर सभागृहात करून दाखवला ‘पुष्पा’ अवतार

अध्यक्षांनी परवानगी देताच विजय यांनी आपल्या चेहऱ्यावर एक गोड हसू आणले आणि अत्यंत नाट्यमय पद्धतीने दाढीवरून हात फिरवत थेट अल्लू अर्जुनच्या ‘पुष्पा’ सिनेमासारखा ‘मै झुकेगा नही’ चा इशारा करून दाखवला. हे करताना ते मिश्कीलपणे म्हणाले, “मी ज्यांच्यासाठी हा इशारा करत होतो, ते विरोधक तर आधीच सभागृह सोडून गेले आहेत; पण तरीही मला हा स्वॅग दाखवायचा होता.” विजय यांचा हा अंदाज पाहताच त्यांच्या पक्षाचे सर्व आमदार आणि सभागृहातील सदस्य आनंदाने ओरडू लागले आणि त्यांनी बाके वाजवून मुख्यमंत्र्यांचे कौतुक केले. सोशल मीडियावर हा व्हिडिओ येताच तुफान व्हायरल झाला आहे.