तेहरानच्या चौकात ट्रम्प कुटुंबाच्या शवापेट्या; इराणच्या कृत्याने जग हादरलं, रक्ताचा बदला रक्ताने, इराणने पुकारलं उघड युद्ध | विदेश बातम्या

गेल्या काही आठवड्यांत ट्रम्प यांना थेट टार्गेट करण्याची इराणची ही दुसरी वेळ आहे. याआधी तेहरानच्याच ऐतिहासिक एंगलाब स्क्वेअरवर एक मोठा बिलबोर्ड लावण्यात आला होता ज्यामध्ये डोनाल्ड ट्रम्प एका खुल्या काळ्या शवापेटीत (कॉफिन) मृत अवस्थेत झोपलेले दाखवले होते. त्यांचे डोळे बंद होते आणि छातीवर लाल रंगाच्या टायवर त्यांचे हात दुमडलेले होते.

हा नवा बिलबोर्ड अशा वेळी समोर आला आहे. जेव्हा इराणचे सर्वोच्च नेते मुजतबा खमेनी यांनी त्यांच्या वडिलांच्या हत्येचा बदला घेण्याची उघड शपथ घेतली आहे. खमेनी यांनी टेलिग्रामवर पोस्ट केलेल्या संदेशात म्हटले आहे की, हा बदला आमच्या संपूर्ण देशाची मागणी आहे आणि तो 100% घेतला जाईल. आमच्या नेत्यांच्या हत्येला कारणीभूत असणारे लोक आपल्या अंथरुणावर शांतपणे मरू शकणार नाहीत, ही इच्छा ते आपल्या सोबतच थडग्यात घेऊन जातील. खमेनी यांच्या या वक्तव्यामुळे इराण कोणत्याही क्षणी मोठा लष्करी हल्ला करू शकतो, अशी भीती व्यक्त होत आहे.

इराणच्या या सततच्या धमक्यांना डोनाल्ड ट्रम्प यांनीही अत्यंत आक्रमक भाषेत प्रत्युत्तर दिले आहे. ‘न्यूयॉर्क पोस्ट’ला दिलेल्या एका मुलाखतीत ट्रम्प यांनी स्पष्ट केले की, जर इराणने त्यांच्या हत्येचा प्रयत्न केला तर अमेरिकेने काय करायचे याचे आदेश त्यांनी आधीच अधिकाऱ्यांना देऊन ठेवले आहेत.

दुसरीकडे दोन्ही देशांमधील या शाब्दिक युद्धानंतर प्रत्यक्ष सीमेवरही लष्करी हालचाली वाढल्या आहेत. ‘अॅक्सिओस’च्या वृत्तानुसार अमेरिकेने इस्रायलमध्ये डझनभर हवाई इंधन भरणारी (Aerial Refuelling) विमाने तैनात करण्याची तयारी सुरू केली आहे.