जीवाचा आटापीटा करून उमेदवारी मिळवली, पण एका कागदाने विक्रम काकडेंची उमेदवारीच अडचणीत? | महाराष्ट्र बातम्या

विक्रम काकडे हे भाजपचे माजी खासदार संजय काकडे यांचे सुपुत्र आहेत. ते नुकतेच भाजपमधून राष्ट्रवादीत (अजित पवार गट) आले आणि त्यांना थेट विधानपरिषदेची उमेदवारी देण्यात आली. यामुळे राष्ट्रवादीच्या अनेक वर्षांच्या निष्ठावंत नेत्यांमध्ये आणि कार्यकर्त्यांमध्ये प्रचंड संतापाची लाट उसळली आहे. धक्कादायक बाब म्हणजे, पक्षाच्या नेत्या सुनेत्रा पवार यांच्या उपस्थितीतच कार्यकर्त्यांनी या उमेदवारीवरून आपली तीव्र नाराजी व्यक्त करत थेट विरोध दर्शवला.

अर्ज भरण्याच्या दिवशी झालेला प्रचंड विरोध आणि दबाव पाहता, परिस्थिती नियंत्रणात आणण्यासाठी पक्षाने आमदार सुनील टिंगरे यांनाही अर्ज भरण्यास सांगितले होते. मात्र, प्रत्यक्षात हा केवळ निर्माण झालेला दबाव शांत करण्यासाठी खेळलेला एक राजकीय डाव होता, अशी चर्चा आता रंगली आहे. सुनील टिंगरे यांना केवळ ‘सबस्टिट्यूट’ (पर्यायी उमेदवार) म्हणून ‘बी फॉर्म’ देण्यात आला आणि ऐनवेळी त्यांचा गेम करत त्यांना ‘कात्रजचा घाट’ दाखवण्यात आला, अशी जोरदार चर्चा सध्या राजकीय वर्तुळात सुरू आहे.

या संपूर्ण वादात राष्ट्रवादीचे ज्येष्ठ नेते विलास लांडे यांनी थेट उपमुख्यमंत्री अजित पवार यांचे सुपुत्र पार्थ पवार यांच्यावर निशाणा साधला आहे. विलास लांडे यांनी अत्यंत गंभीर आरोप करत म्हणाले, विक्रम काकडे यांना कोणतीही राजकीय पार्श्वभूमी किंवा पक्षातील योगदान नसताना केवळ पार्थ पवारांचे मित्र आणि व्यावसायिक भागीदार म्हणून उमेदवारी देण्यात आली आहे.

ज्या प्रॉपर्टी टॅक्स बाबत प्रश्नचिन्ह उपस्थित करण्यात आली आहे ती प्रॉपर्टी ४ वर्षापूर्वी विक्रम काकडे यांच्याकडून विकण्यात आली आहे. सदर खरेदी विक्री खत हे निवडणूक निर्णय अधिकाऱ्याकडे जमा करण्यात आली आहे.